MINISTERIO DO TURISMO DE TIMOR LESTE

Taka Fatin Prostituisaun

Dili - Aktividade prostituisaun wainhira buras iha rai laran, bele afecta dignidade nasaun nian no sei lori moras neebe susar atu kura. Tamba nee, Governo hahú esforsa ho medidas atu bele kontrola no taka kedas aktividade nee wainhira identifika.
Medida hahú implementa husi Governu, tamba kria ona regulamentu ida hodi bandu total loke fatin prostituisaun.
Atu bele konkretiza ho efisiensia medidas hirak neé, husi parte imigrasaun tenki forte no konsistente, atu nuné bele evita ema estrangeirus tama TL utiliza visto turista hodi aproveita halao fali aktividades seluk iha rai neé, liu-liu aktividade prostituisaun, to influensia mós ema timor oan rasik. Atu prevene no kombate situasaun neé, Servisu Investigasaun Criminal (SIC), hamutuk ho Ministériu Turizmu, Comersio no Industria (MTCI) inklui Polisia Nasional Timor Leste (PNTL) halao operasaun de revista ba fatin prostituisaun hodi bele taka kedas.
Servisu konjuntu neé konsegue taka tiha ona fatin prostituisaun lubuk neebe identifika iha sidade Dili. Kinta-feira (02/06/2011), MTCI liu husi diresaun Inspeksaun Alimentar i Ekonómika (IAE) hamutuk ho PNTL taka fatin prostituisaun iha Aitarak-Laran, besik Palacio Prezidensia da Republika.
Razaun nebé aprezenta nain balun fatin prostituisaun nian katak, sira tenki halao aktividade nebé refere hodi bele ajuda hetan osan ba atende nesesidade loron-loron nian, mesmu ke sira rasik hatene katak nee laos dalan diak atu sustenta moris, tamba iha impaktu negativu ba ema seluk nia moris.
Xefi Departementu Inspeksaun, José Ferreira Martins afirma, nia ho nia ekipa hamutuk ho PNTL sei kontinua nafatin halao knaar tuir lei no esforsa diak liu tan atu bele prevene loke fatin fatin prostituisaun iha rai laran. Media MTCI