MINISTÉRIO DO TURISMO, COMÉRCIO E INDÚSTRIA | MTCI TIMOR-LESTE

Dili - Investor internasioal barak mak hakarak tebes halao investimentu iha Timor Leste, hanesan investor kuinesidu ida husi nasaun Paris, ho naran Eric Duval, neebe Prezidenti ba nia kompania hamutuk 450 iha nasaun sira iha mundu.

Eric Duval, Sabado (29/01) ho nia delegasaun halao vizita mai Timor Leste tuir konvite husi Governo liu husi Ministru Turizmu Comercio no Industria (MTCI), Gil da Costa Alves.

Iha Timor Leste, Eric Duval haree ho matan situasaun real iha rai laran, no nia rasik hateten kontenti atu halao investimentu ho diak liu hanesan rai seluk iha mundu.

Eric Duval durante iha Timor Leste, akompania husi Ministru Gil da Costa Alves, hasoru malu ho Prezidenti Republika, José Manuel Ramos Horta, Vice Primeiru Ministru, José Luis Guterres, Ministra Finansas, Emilia Pires, Sekretariu Estadu Formasaun Profisional (SEFP), Bendito Freitas no membro Governo seluk.

Iha Palacio do Governo, Eric Duval offerese medalha ho marka “Ecumenical Knights of Malta” ba membro Governo sira hanesan simbolu kooperasaun entre Eric Duval rasik ho membro Governo sira.

Eric Duval espera Timor-oan tomak hametin liu tan dame no paz hodi garante estabilidade nasional, nunee, nia rasik no investidor seluk iha mundu neebe koinesimu tebes bele laran kmaan mai fakar osan iha rai laran. Media MTCI

Dili - Total emprejario nasional no internasional neebe rejistu ona iha Ministerio Turizmu Comersio i Industria (MTCI), iha tinan 2010 hamutuk 5961.

Husi total neebe iha emprejario permanente hamutuk 1218 no provizorio hamutuk 4743.

Total emprejario Nasional hamutuk 4252, permanente 986, temporario 3266; emprejario estranjeiros hamutuk 491, permanente 232, temporario 259.

Emprejario neebe kategoria hanesan permanente tamba hetan ona statuto husi Ministerio Justisa. Media MTCI

Dili - Inspeksaun Geral Jogos, Ministerio Turizmu Comercio i Industria (IGJ-MTCI), Kinta (27/01), halao operasaun ba jogos illegais iha Dili laran no konsege prende makina Jogo (Kassino) hamutuk 13 neebe organiza husi ema estranjeirus husi nasaun China, iha Hotel Luxuario, Pantai Kelapa-Dili.

Operasaun neebe halao sei kontinua nafatin no ba fatin balun neebe IGJ-MTCI sei halao kooperasaun ho Polisia atu nunee bele blokeia fatin hirak neebe identifika ona ema halao aktividade jogos illegais.

Inspektor Geral Jogos-MTCI, Miguel Lobato neebe lidera diretamente operasaun nee informa, alein de prende ona Makina Jogos illegal iha Hotel Luxuario nee, nia parte mos identifika tan ona fatin Jogo illegal Kassino iha Dili laran hamutuk 2, neebe ida halao husi ema estranjeirus (China) servisu hamutuk ho Timor-oan, no ida seuk Timor-oan rasik mak organiza.

Miguel Lobato afirma, Governo bandu tebes jogo Kassino loke iha rai laran tamba Jogo nee bele estraga ekonomia familia ida-idak nian tamba jogo nee halimar ho osan boot. No jogo nee ema bele regula (ceting) tiha hodi halo ema neebe joga mak lakon barak liu duke manan.

Miguel Lobato hatutan, Governo so legaliza deit jogo SDSB, Bola Guling no jogo tradisional seluk.

Makina jogos illegal neebe prende, Miguel Lobato informa, sei prosesa tuir lei neebe iha no servisu hamutuk ho parte imigrasaun.

Oras nee dadauk Makina Jogo sira IGJ-MTCI prende nee haloot hela iha edefisio MTCI, Fomento, Mandarin-Dili. Media MTCI

Dili - Hanesan parte ida husi area Turizmu, Governo liu husi Ministeriu Turizmu Comersio i Industria (MTCI) organiza festa CARNAVAL ba 3o periodo iha Timor Leste.
Eventu nee sei halao iha loron 12 de Fevereiro, hanesan loron neebe kada tinan komemora festa CARNAVAL iha mundu inklui Timor Leste. Iha Timor Leste konsidera loron nee hanesan loron “Alegria na Liberdade e Pluralidade”.

Ministru Turizmu Comersio i Industria (MTCI), Gil da Costa Alves sublinha, CARNAVAL neebe halao hanesan parte ida mos promove Kultura Timor Leste, oin sa bele influensia ema rai liur.

“CARNAVAL hanesan karakter cultural no liliu rekreativu, ema hirak neebe partisipa iha CARNAVAL nee bele hatais variasaun oin sa dada antusianzu ema seluk nian liliu turista sira,” hatete Ministru Gil Alves ba Jornalista sira, Kuarta (25/01), iha uma fukun Parlamentu Nasional.

Iha eventu nee Ministru Gil Alves haktuir, sei hatudu aktividade oi-oin, alen de lao tuir estrada no komunidade ida-idak liu husi grupu bele halao iha fatin liu husi dansa kultura no dansa modernu oi-oin.

“Loron nee hanesan loron neebe ema bele goza malu ho aktividade oi-oin, para depois tama fali ba loron sério ka loron servisu,” hatete Ministru Gil Alves.

“CARNAVAL iha Timor hanesan mos CARNAVAL iha rai sira seluk iha mundu, hatudu mos oin sa ita nia kultura bele influensia mos kultura rai liur,” hatutan Ministru Gil Alves.

“Ohin loron ita hatais Kalsa laos kultura Timor, Kultura Timor hatais Tais, tamba nee ita hatudu oin sa ita bele influensia,” tenik Ministru Gil Alves. Media MTCI

Dili-Orasmentu Geral do Estado tinan 2011 ne’ebe mak aloka ba MInisteriu do Turismo, Comersiu no Industria (MTCI) ho montante US$ 27,209 miilioes hetan aprovasaun iha Parlamentu Nasional Tersa-Feira (25/01) ho votus maioria.

Orasmentu ne’ebe mak aloka ba MTCI ho nia prioridade hanesan Salario no Vensementus hamutuk US$ 916 mil, Bens e Serviços US$ 22,400 milioes, Transferençia US$ 1,600 milioes, capital Menor US$ 653 mil no Kapital Dezenvolvimento US$ 1,640 milioes hetan aprovasaun ho ho total votus hanesan Afavor 38, kontra 5 no abstensaun 18.

Antes hetan aprovasaun iha mos proposta 6 ne’ebe mak aprezenta husi deputadu proponent husi bankada opozisaun. Husi proposta hirak ne’e, deputadu opozisaun kestiona liu kona-ba arendamentu propriadades, kontratu asesores no mos ba programa povu kuda governu sosa ne’ebe mak aloka osan hamutuk 5,344 milioes liu husi Diresaun Nasional Comersiu Domestiku.

Maske antes ne’e iha tinan 2009 orsamentu ne’ebe mak aloka ba kompra produtus lokal hamutuk US$ 7 milioes ne’ebe mak hamenus tiha ba US$ 2 milioes.

Ho razaun katak, iha tinan 2011 produsaun husi povu agrikultores sira menus tamba impaktu husi mudansa klimatika ne’ebe mak afeita ba kualidade no kuantidade produsaun nian.

Husi total orsamentu ida ne’e, ne’ebe mak aloka ba Gabinete Ministro hamutuk US$ 461 mil, Gabinete Auditoria Interna US$ 63 mil, Gabinete Diretora Geral US$ 332 mil, Diresaun Nasional Administrasaun Finansas US$ 3,259 milioes, Diresaun Nasional Peskiza e Dezenvolvimentu US$ 342 mil, Diresaun Nasional Comersiu Externo US$ 414 mil, Diresaun Nasional COmersiu Domestiku US$ 5,438 milioes, Diresaun Nasional da Industria US$ 455 mil, Inpeksaun Alimentar e Ekonomiku US$ 193 mil, Inspeksaun Geral dos Jogos US$ 206 mil, Seckretariu Estadu Turismo US$ 69 mil, Diresaun Nasional do Turismo US$ 1,769 milioes no ikus liu Fundus Seguransa Alimentar ho total US$ 14, 208 milioes.

Husi orsamentu hirak ne’e, tuir Ministru Gil ne’ebe mak halao apresentasaun informa katak, osan hirak ne’e sei utiliza tuir nesesidade ne’ebe mak iha no sei utiliza hodi tulun povu Timor Leste sai husi kiak no mukit.

Maske hetan mos kritikas barak husi partidus opozisaun maibe MInistru Gil iha konfiansa katak, osanmentu ida ne’e nia Ministeriu sei utiliza ho responsabilidade no aloka tuir nesesidade ne’ebe mak Timor oan iha. (Media-MTCI)

Dili-Ministeriu do Turismo, Comercio no Industria (MTCI) apoiu Piano ba Seminariu Maior Fatumeta, Dili Tersa-Feira semana ida ne’e wainhira hahu Ano Letivu foun ba tinan 2011.
Piano ida ne’e intrega diretamente husi Ministru Turismo, COmersiu no Industria Gil da Costa Alves ba Diretor Seminariu Maior Fatumeta Pe. Domingos Alves.

Remata misa komemorasaun ano letivu foun 2011, Ministru TCI Gil da Costa Alves ne’ebe mak hola parte mos iha misa refere, hateten ajudus ne’e hanesan parte ida atu apoiu actividades iha prosesu aprendijazem.

“Ajudus Piano ida ne’e, hanesan apoiu ne’ebe mak MTCI fo ba Seminariu Maior hodi utiliza ba actividades lorloron nian,”dehan MInistru Gil.

Ministru Gil mos husu ba estudante Seminariu Maior atu aproveita didiak Piano ne’e hodi nune’e bele ajuda aktividade seminariu nian.

Piano ne’ebe kustu US$ 8 mil ne’e, utiliza kedas husi Seminariu Maior iha serimonia komemorasaun ano letivu foun.

Pe. Domingos Alves senti kontente ho ajudus ne’ebe mak MTCI oferese tamba husi ajudus ida ne’e bele ajuda serimonia misa iha Seminariu refere.

“Ami senti kontente ho ajudus ida ne’e no agradese mos ba Ministru Turismo, Comersiu no Industria nia ajudu. Husi ajudus hirak ne’e bele ajuda ami hamenus ami nia defikuldades ne’ebe mak durante ne’e ami hasoru iha Seminariu ida nee,”informa Pe. Domingos. (Media MTCI)

JAPAUN-Grupo feto iha Takato Japaun promove produtus lokal Timor Leste hanesan Kafe no Tais iha festival Takato Park ne’ebe halao iha sidade Ina hanesan sidade moris fatin ambaxador Japaun mai Timor Leste Iwao Kitahara halao iha 14 de Novembro tinan 2010.

Promosaun produtus lokal TL ne’ebe mak halao iha Japaun ba dalatolu partisipa husi delegasaun 12 husi Takato Sidade Ina Japaun nian ne’ebe mak iha fulan Agustu liu ba partisipa mos iha komemorasaun loron proklaramasaun independensia Timor Leste nian badala 35 iha Dili.

Delegasaun 12 ne’e lori produtus lokal Timor Leste nian hanesan kafe no tais hodi apresenta iha festiva ida ne’eba hodi halao promosaun badala III.

Liu husi karta ne’ebe mak Ambasador Japaun hatoo ba Primeiru MInistru RDTL Kay Rala Xanana Gusmão ne’ebe mak envia ba MTCI hateten katak, povu Japaun senti kontente ba produtus ne’ebe mak grupo feto sira apresenta.

“Iha 14 novembru 2010, grupu feto ida iha Takato faan kafe Timor no taiss iha festival ne’ebe akontese ba dala rua atu promove produtu Timor iha Takato, no produtu nee mos halo ema barak gosta. Ho hanoin ida nee, membru delegasaun 12 nee sosa produtu Timor balun par atu organiza promosaun ba dala III. Hau nia fatin moris nee, Takato of Ina City, sidade neebe kiik oan. Maibe, promosaun hanesan nee oportunidade impotante tebes ba ema sira iha Takato no mos vizitante sira atu hatene no komprende konaba Timor oan sira. vizitante sira neebe mai iha takato, hare TL nia produtu, halo sira hanoin atu hadomi TL,”dehan Ambasador Iwao Kitahara. (Media-MTCI)

DILI- Ministeriu do Turismo, Comersiu no Industria iha Sabadu (08/01) foin lalais ne’e halao inagurasaun ba restorante Metiaut hamutuk 12 no intrega ba grupo feto 26 hodi utilize ba aktividade negosiu.

MInistru TCI Gil da Costa Alves iha nia intervensaun hateten, boa sorte ba grupo hirak ne’ebe mak hetan fiar husi governu hodi utilize restorante hirak ne’e hodi halao negosiu. No husu ba restorante nain sira atu utilize didiak oportunidade ida ne’e.

“Boa Sorte ba imi, ajuda malu ba hadia imi nia servisu no hadai imi nia vida liu husi dalan ne’ebe mak governu fo ona ba imi. Ne’e hanesan oportunidad eba imi hanesan empresas kiik sira atu hahu halao negosiu ho kondisaun diak no mos hadia kualidade servisu imi nian iha atendimentu ba konsumedores,”dehan Ministru Gil.

Ministru mos husu ba restorante nain sira hodi halao kompetissaun ho justu ho kualidade aihan ne’ebe mak diak hodi dada atensaun konsumedores tama ba restorante laran.

Iha fatin hanesan mos Presidente da Republika DR. Jose Ramos Horta ne’ebe mak marka mos prezensa iha serimonia inagurasaun ida ne’e hatoo nia parabens ba Ministeriu do Turismo, COmersiu no Industria ne’ebe mak hahu ona nia projetu iha area Tasi ibun Metiaut hanesan dalan ida atu hatudu Timor Leste nia rikeza iha tasi ninin.

PR HOrta mos husu ba grupo ne’ebe mak hetan fiar atu utiliza restorante ida ne’e atu iha responsabildiade ba ida-idak nia restorante.

“Husu ba imi n’eebe mak hetan oportunidade husi governu atu utiliza restorante ida ne’e atu iha responsabilidade ba ida-idak nia restorante hadai mos imi nia kualidade hygiene nian. Parabens no Boa sorte ba imi hotu,”hateten PR Horta.

Iha fatin hanesan Diretora Geral MTCI Dra, Manuela G.B. Corte-Real ne’ebe mak toma konta ba projectu hirak ne’e hateten, restorante ne’ebe mak MTCI prepara hamutuk 12 kada uma hetan fatin 2 ba restorante total hamutuk 26.

Orsamentu ba projectu ida ne’e, turi Diretora Geral ne’e katak, osan ne’ebe mak MTCI aloka hamutuk US$ 950.000, foti husi orsamentu jeral do estadu tinan 2009. Kontruksaun hahu iha Desembru tinan 2009 no finalize iha Dezembru 2010.

Kona-ba regulamentu, Diretora ne’e hakturi, “Grupo hirak ne’ebe mak utililza restorante ne’e sei selu osan ho valor US$ 50.00 ba unidades restorante ne’ebe mak kiik no US$ 80.00 ba unidade ne’ebe mak boot kada fulan ba konta bankaria do estadu,”esplika Diretora ne’e.
MTCI mos fo konfiansa ba empresas LNO atu maneza gestaun iha restorante refere.

Remata inagurasaun PR HOrta Akompanhado husi MInistru TCI, Diretores no komunidade Metiaut halao visita ba restorante hodi koko aihan ne’ebe mak prepara husi restorante nain sira.

(Media MTCI)

Manatutu- Ministeriu do Turismo, COmersiu no Industria foin lalais ne’e (07/01) halao lansamentu Priemeira Produsuan Masin Timor iha Ma’abat Distritu Manatutu, ne’ebe mak responsabiliza husi kompania Belak salt.

Ministru TCI Gil da Costa Alves iha lansamentu ida ne’e hateten Produsaun ida ne’e hanesan dalan ida hodi hamenus importasaun masin mai rai laran no mos hatudu ba mundu katak, Timor oan mos bele halao produsaun rasik. Ministru Gil mos haktuir Manatutu hanesan primeiru distritu ne’ebe mak harii industria Masin Timor no Fabrika eletronika, husi ida ne’e Mantutu bele fo proveitu diak ba distritu sira seluk.

“Husu Manatutu oan sira nia seriedade ba produsaun ida ne’e no mos fabrika ne’ebe mak iha ona iha distritu ida ne’e, hamutuk ita hatudu ba mundu katak, Timor mos bele hahu husi Manatutu,”dehan Ministru Gil.
Ministru TCI hetan akompañamentu husi Vise Ministru Ekonomia no Dezenvolvimentu Cristiano da Costa Diretores MTCI, autoridade lokal no populasaun Manatutu rasik.

Diretor Kompania Belak Salt João Alves ne’ebe mak responsabiliza ba produsaun ida ne’e, agradese ba apoiu tomak ne’ebe mak governu liu husi MTCI fo ba kompañia ida ne’e hodi ajuda governu impede inportasaun no fo kampu de servisu ba Timor oan sira.

Iha fatin hanesan mos Adminitrador Distritu Manatutu husu ba populasaun Manatutu atu servisu hamutuk hodi alkansa mehi povu Timor Leste nian hodi hamrik rasik no apoiu malu hodi produsaun ida ne’e bele kontinua ba oin. (Media-MTCI)

Dili-Ministerio Turizmu Comercio i Industria (MTCI), Kinta (06/01) offisialmente entrega tiona Kareta Coolbox neen (6) ba Grupu Kooperativa neebe durante nee halao aktividade faan no hola ikan, modo tahan iha Distritu sira.

Grupu Kooperativa hamutuk 6 mak hetan apou nee, Grupu ida husi Sub-Distritu Maubisse, ida husi Distritu Baucau, ida husi Distritu Likisa, ida husi Distritu Ermera no rua husi Distritu Dili.

Serimonia entrega Kareta neebe halao iha edefisio MTCI, Fomento Mandarin Dili nee entrega diretamente husi Ministru Turizmu Comercio i Industria, Gil da Costa Alves, akompania husi Diretora Geral MTCI, Manuela Corte Real, Inspektora Geral Seguransa Alimentar i Ekonomiku nuudar mos Diretora Interino Industria, Florentina Smith, Direktur Nasional Turizmu, José Dias Quintas, Direktur Nasional Registo de Negocio, Fernando HI, Xefi Gabineti MTCI, Henrique Carlosno partisipantes seluk inklui Grupu Kooperativa sira.

Iha Ministru Gil Alves nia lian badak, Ministru Sublinha, responsavel Grupu sira neebe hetan apoiu husi MTCI nee tenki halao knaar ho didiak atu nunee sasan neebe Governo fasilita bele fo benefisio ba grupu sira rasik no ba komunidade sira.

Benefisiantes senti kontente ba apoiu ne’ebe mak oferese husi governu liu husi Ministeriu do Turismo, Comercio no Industria tamba liu husi ajudus ne’ebe bele fasilita povu aileba sira la presiza lao dok hodi faan sira nia produtus lokal mai kapital maibe bele faan tuir kareta ne’ebe mak governu oferese ona.

“Ami kontente ba ajudu ida ne’e, tamba husi kareta coolbox ida ne’e, bele halo distritu ida ne’ebe mak nunka konsume ikan bele ona konsume ikan no sira ne’ebe mak ladun konsume modo tahan bele ona konsume modotahan no aifuan sira. Tamba kareta hirak ne’e sei fasilita ami hodi bele faan aihan hirak ne’e to iha area rurais iha distritu 13 nia laran,” dehan nia. (Media MTCI)