Florentina Smith : IAE-MTCI Prepara 5 Milliaun Sosa Produtu Lokal
MTCI TIMOR-LESTE
DILI – Inspectora Geral Alimentar e Ekonomia (IAE) Ministeriu Turismo, Comerciu no Industria (MTCI), Dra. Florentina C. P. M Smith hatete, iha tinan ida ne’e, MTCI sei prepara 5 Milliaun dollar Amerikanu para kompra produtu lokal.
“Maske nune’e, prosesu kompra produtu lokal ne’e sei demora oituan. Alem de presiza fo tempu ba agrikultor sira para bele koleita sira nia koto, hare no produtu sel-seluk tan, IAE mos sei prepara armazem iha distritu no sub distritu ne’ebe foin mak intrega xave husi kompanhia,” hatete Florentinha iha konfrensia da imprensa ne’ebe hala’o iha ninia kna’ar fatin, Matadouro, Dili, Tersa-Feira (4/05).
Tuir inspectora geral ne’e, 5 milliaun dolar Amerikanu ne’ebe IAE prepara, para sosa 7.500 toneladas produtu lokal, kompostu husi hare, batar, forré keli, forré mungu, koto, mina nú no masin.
“Tuir planu, programa Povu Kuda, Governo Sosa ne’e sei hala’o iha Junhu to’o Julhu nia laran. Tamba ne’e, IAE apela ba agrikultor sira atu prepara ona sira nia produtu para bele fa’an ba governo, liu husi kompanhia ne’ebe sai nuudar agente ba governo,” nia hatete tan.
Hatan ba perguntas konaba ligasaun servisu ho Ministeriu Agrikultura, Florentina dehan, MTCI no ministeriu kompotente inklui mos FAO, WFP no selu-seluk tan forma tiha ona ekipa ida para haree programa ida nee.
Durante ne’e servisu konjunta ne’ebe MTCI hala’o ho Ministeriu Agrikultura lao diak. Ministeriu Agrikultura mak prepara dados konaba potensial produtu lokal kada distritu. Ho ida ne’e, ekipa husi IAE bele identifika produtu molok kompanhia sira tun para kompra produtu lokal.
“MTCI iha mos akordu ho Ministeriu Edukasaun, para bele suporta merenda escolar liu husi fornhese fos rai, koto, forré mungu no forré keli. Alem de ida ne’e, MTCI mos prontu para apoio ajuda humanitaria ne’ebe servisu hamutuk ho Ministeriu do Solidaridade Sosial (MSS).”
Konaba armazem MTCI, tuir Florentina, agora iha ona distritu Maliana, Maubessi, Suai no Oecusse. “Ami mos sei kria kondisaun. Konserteja, produtu lokal ne’ebe mak ami kompra, ami sei aloka besik liu iha rejiaun ne’ebe ami koloka tuir armazem ne’ebe mak iha,” Inspectora Geral IAE ne’e hatete. MEDIA-MTCI
