Komunikadu da Imprensa : MTCI Temporariamente Hapara Sosa Produtus Lokal (batar no hare), Diretora Geral MTCI “Husu Povu Keta Tauk Hasa’e Produsaun”
MTCI TIMOR-LESTE
Dili, 05 de Janeiro de 2009, Responde ba Notisia STL, ne’ebe mak publika iha Edisaun Tersa-Feira dia 5 de Janeiru de 2010, kona-ba Notisia ne’ebe mak hakerek katak, “Hapara Sosa Produtus Lokal, Responde Ona Povu Kuda Governu Sae,”.
Ministeriu do Turismo, Comersiu no Industria hakarak informa deit ba Povu agrikultores hotu katak, MTCI LAOS HAPARA SOSA PRODUTUS LOKAL, maibe bazeia ba tempu udan no gestaun ne’ebe mak MTCI utilize durante ne’e presiza hetan mudansa no produsaun ne’ebe mak durante ne’e sa’e makas ho ida ne’e maka, MTCI HAPARA TEMPORARIAMENTE SOSA PRODUTUS LOKAL.
Diretora Geral MTCI, Manuela G.B Corte-Real deklaran katak, iha tempu udan ne’ebe mak monu rai, Povu Agrikultures presiza aihan hodi sustenta sira nia moris lor-loron hodi hein produsaun, iha tempu ida ne’e produsaun (Batar no Hare) laiha. Ho razaun ida ne’e mak MTCI temporariamente hapara sosa produtus local hodi hein tempu produsaun nian.
“MTCI mos aproveita tempu udan ne’e hodi hadia gestaun ne’ebe mak iha durante ne’e. Tamba MTCI rekoñese katak, gestaun ne’ebe mak iha durante ne’e presiza hetan mudansa oituan tamba produsaun tinan-tinan sa’e makas.
Bazeia ho politika ne’ebe mak IV governu Konstituisional trasa ona durante ne’e liu husi MTCI ho Ministeriu Agrikultura no Peskas liu husi programa fahe tratores ba povu agrikultores,”dehan Diretora Geral ne’e.
Hatan ba kestaun produtus hanesan Batar no Hare ne’ebe mak tama ilegalmente mai TL, Diretora Geral ne’e haktuir katak, realidade ne’ebe mak MTCI hetan durante ne’e iha duni ema balun ne’ebe mak hatama produtus local hanesan Batar no Hare mai TL hodi faan fali ba governu. Maibe hahalok ne’e konsege hetan husi ekipa insepksaun MTCI nian ne’ebe mak servisu iha baze.
“Ne’e hanesan hahalok ida bele hamate agrikultores iha rai laran, tamba produtus ne’ebe mak governu sosa mak produtus husi rai laran ne’ebe mak povu Timor Leste produs laos nasaun seluk nia proutus,”reforsa Diretora Geral.
Diretora Geral mos haktuir katak, durante tempu udan normalmente, povu laiha produsaun (Batar no Hare). Tamba povu presiza aihan hodi hein tempu produsaun nian. Ne’e signifika katak, Batar no Hare ne’ebe mak povu iha agora ne’e hanesan stok ba sira han hodi hein tempu produsaun nian.
Tamba ne’e, Diretora Geral ne’e husu ba povu Agrikultores hotu atu lalika tauk atu hasa’e nia produsaun tamba Governu Sei LAHAPARA SOSA PRODUTUS LOKAL. Governu sei kontinua sosa povu sira nia produtus.
“Tempu udan ne’e, hanesan tempu diak povu agrikultores hodi hasae sira nia produsaun, husu imi (Povu Agrikultores) atu aproveita tempu ida ne’e hodi servisu badinas hodi hasae nafatin produsaun.
Bainhira produsaun sa’e makas imi mos sei hetan rendimentu ne’ebe mak makas. Bainhira gestaun MTCI lao ho diak ona no imi nia produsaun pronto ona atu faan, MTCI sei PRONTU ATU SOSA NAFATIN,”dehan nia. (Média MTCI)
