MTCI Hapara Distribuisaun Foos Liu Husi Empresarius, Fo Responsabilidade Ba Xefe do Sukus
MTCI TIMOR-LESTE
DILI-Diretora Geral Ministeriu Turismo, Comersiu no Industria (MTCI) Manuela G. B. Corte-Real afirma, empresarius laiha razaun tan ona atu faan foos governu tamba lakon ona fiar husi governu ho razaun durante ne’e foos governu kontinua hetan manipulasaun husi empresarius. No governu fo fiar ba Xefe do Sukus hodi halao distribuisaun ba foos.
“Wainhira sira haree ema ne’ebe sira deskofia ema governu nia mak sosa entaun folin 12 dolar ou sira dehan foos laiha maibe povu simples mak sosa sira hasae nia folin liu husi presu normal,”tenik nia iha nia servisu fatin Fomento Mandarin Dili Kuarta (13/01).
Manuela reforsa, tuir informasaun ne’ebe iha inspeksaun alimentar MTCI konsege prende foos sakas 700 ne’ebe mak tuir lolos faan ho presu 12 dolar maibe empresarius faan liu husi presu normal.
“Agora dadaun foos hirak ne’e hatama ona ba armajen governu,”informa Diretora Geral ne’e. Nia sublinha katak, Inspeksaun Alimentar Ekonomiku MTCI kontinua servisu hamutuk ho PNTL hodi halao inspeksaun iha Distritu 13 nia laran.
“Ami mos oras ne’e dadaun implementa sistema foun ne’ebe nia despacho sai tiha ona iha fulan Janeiru ne;e nia laran. No fo sain diretamente husi Primeiru Ministru RDTL Senor Kay Rala Xanana Gusmão,”dehan nia.
Depacho foun ne’e haktuir katak, distribuisaun foos sei liu husi xefe de sukus tuir familia iha sukus ida-idak.
“Karik xefe de sukus sira iha ona preparasaun diak ona no ida dadus kompletu ona kona-ba sira nia populasaun entaun sir abele kordena ho ami no distribuisaun it abele halao ona,”dehan nia.
Ba iha area rurais, tuir Diretora Geral ne’e, nia parte sei halao kordenasaun ho Administradores distritu no Sub-Distritus atu halo diskusaun detalhu para konsidera mos kondisaun real iha ida-idak nia sukus.
Iha fatin seluk Inspektor Geral Alimentar e Economiku (IAE-MTCI) Epifanio da Silva Faculto informa katak, durante semana rua nia laran iha fulan Janeiru ne’e, ekipa Inspeksaun prende foos sakas 700 resin sakas iha capital Dili.
“Ami prende tamba Empresarius hirak ne’e faan la tuir rekomendasaun, tuir rekomendasaun sira tenki faan iha Distritus maibe sira faan fali iha capital Dili,”tenik nia.
Kazu manipulasaun foos ami rezista hamutuk 27 kazu. Kazu ne’e ami informa ba Diretora Geral no Diretora Geral fo karta ba iha Polisiai Distritus ida-idak hod bolu atensaun ba empresarisu ne’ebe mak ekipa inspeksaun kaer toman.
“Sangsaun ne’ebe mak ami fo maka ami sei la fo oportunidade fali ba empresarius ne’ebe mak faan foos atu kontinua sai parseirus governu nian,”informa Faculto. (JND-02)
Jornal Nasional Diariu,
Edisaun Kinta-Feira, dia 14 de Janeiru de 2010.
Pagina 10.
