MINISTÉRIO DO TURISMO, COMÉRCIO E INDÚSTRIA | MTCI TIMOR-LESTE

Ministeriu Turismu, Komersiu no indústria (MTCI), liu husi Inspeksaun Alimentar e Ekonímika-IAE, halao sosializasaun ba Lei nebé regula Krimi Asambarkamentu e Espekulasaun, inklui Dekretu-Lei Presu Justu, nebé aprova ona husi Konselhu Ministrus no promulga husi Presidente da Repúblika.

Lei rua nebé refere mak hanesan: Lei No 4/2011 konaba Krimi Asambarkamentu e Espekulasaun no Dekretu-Lei No 29/2009 konaba Presu Justu.

Directora-Geral MTCI, Manuela Georgina Corte-Real iha abertura, hateten katak presiza duni esklaresimentu konaba dokumentu rua neé hodi bele sensibiliza empresarius no komersiantes atu bele konhese diak liu tan lei rua neé hodi evita dúvida wainhira implementa.

Ba participantes, Manuela Corte-Real explika katak, aktividade hanesan kompetensia konstitusional Governu nian no obrigasaun atu diriji no regula aktividade ekonómika no sektor sosial, nuné mós atu proteje konsumidores hodi labele prejudika parte rua neé.
Florentina Smith, Inspectora-Geral IAE, iha nia intervensaun, husui ba emprezarius no komersiantes importadores, grosistas no retalhu sira atu aproveita oportunidade ne’e hodi bele hatene konaba Lei rua neé atu evita hetan sansaun husi autoridade wainhira la kumpri norma hirak neé.

Dekretu-Lei ba Presu Justu ho objektivu atu estabelese forma intervensaun husi Administrasaun Públika iha formasaun presu, atu nuné bele fasilita regula presu ba bens no servisu nebé konsideradu fundamental ba bem-estar populasaun nian.
Regime neé kontribui mós ba justisa sosial no ekonómika familia nian, liu husi prátika presu justu neb’e akompanhadu ho medidas kriminalizasaun no espekulasaun presu.

Konaba Lei Krimi Asambarkamentu no Espekulasaun,atu garante efikasia sansaun ba intervensaun husi Estadu iha rasionalizasaun ba distribuisaun, formasaun no kontrolu ba presu, nuné mós atu hamate pr’atika espekulativa sira, evita mós pr’atika komersila restritiva neb’e ho refleksu negativu konaba presu.

Maibe ho diploma neé molok kriminaliza asambarkamentu no espekulasaun, sei estabelese rejime espesial ida ba krimi hasoru ekonomia, maibe ho natureza públika nebé la hakerek iha Kódigu Penal hodi bele fó protesaun ba merkadus no konsumidores, inklui bens jurídikus nebé merese tutela penal.

Seminariu nebé halao iha Sentru Konvenções Díli-CCD, konta ho prezensa husi emprezarius, komersiantes, funsionarius MTCI rasik, inklui konvidadus seluk.(Media MTCI)