Expo Produtu Lokal Iha Lecidere: “Dezenvolve Kualidade, Assesu ba Merkado Internasional”
MTCI TIMOR-LESTE
Dili – Produtus lokal, arte zenato no arte kultura, neebe timor-oan sira rasik mak produz, presiza tebes promove no dezenvolve diak liu tan atu nunee bele atrai konsumidor sira tantu nasional no internasional, i bele mos assesu ba merkado internasional.
Governo, liu husi Ministerio Turizmu Comercio no Industria (MTCI), halao tiha ona esforsu lubun boot atu labele abandona hela produtus rai laran, no Ministerio nee kontinua hatutan diak tebes knaar neebe iha.
Nunee, liu husi komemorasaun loron restaurasaun independensia Timor Leste ba dala sia (9), neebe monu iha loron 20 de Maio de 2011, MTCI koordena ho Ministerio relevante loke expozisaun produtu lokal iha Tasi-Ibun Lesidere, Dili.
Expozisaun neebe diretamente loke husi Primeiru Ministru (PM), Kay Rala Xanana Gusmão, ho tema “Promove no Dezenvolve Produtu Lokal” nee hetan sussesu boot tamba produtu neebe prepara maioria hahuu iha kualidade diak ona kompara ho tinan hirak kotuk no komunidade barak tebes mak ba halao vizita no sosa produtu hirak nee.
Iha PM Xanana nia diskursu, PM Xanana hatenen, produtu lokal hotu neebe Timor-oan sira rasik produz nee presiza dezenvolve atu nunee bele assesu ba merkado internasional. Tamba nee liu husi expozisaun neebe halao, PM Xanana hatutan, intensaun Governo diak atu promove produtus hirak neebe iha no atrai konsumidor sira tantu nasional no internasional.
Expozisaun neebe halao durante loron lima (5), hahuu husi Kuarta (18/05) too Segunda (23/05).
Entertantu iha okajiaun, Diretur Nasional Comercio Domestico (DNCD) – MTCI, Fernando HI, neebe sai hanesan Prezidenti komisaun organizadora ba expozisaun nee sublinha, nia parte sei kontinua esforsu atu iha tinan oin mai loke expozisaun hanesan di’ak liu tan. No sei involve makaas liu tan partisipantes sira husi Distritus.
Orsamentu neebe uza ba expozisaun nee hamutuk U$D. 60 mil.
“Hau espera katak, eventu iha tinan oin mai ita sei halao diak liu tan tamba, esperiensia ba preparasaun mosu diak liu tan,” tenik Fernando HI iha nia Diskursu.
Eventu neebe halao tuir observasaun lao ho sussesu tebes tamba komunidade sira liliu iha Dili barak tebes mak ba halao vizita no produtus neebe prepara maioria iha kualidade hodi atrai konsumidor sira.
Kona ba seguransa, iha expozisaun nee lao diak tebes tamba iha koordenasaun husi parte PNTL. Media MTCI
