Kompanha Jogos Ilegais Tenki Kompete Iha Tenderizasaun
MTCI TIMOR-LESTE
<DILI – Gabinete Inspeksaun Geral dos Jogos, Ministeriu Turismo, Comerciu no Industria (MTCI) husu ba kompanha jogos ilegais iha Timor-Leste, atu kompete iha prosesu tenderizasaun, para bele hetan rekonhesementu husi governu.
Inspektor Geral, Miguel dos Santos Lobato hato’o kestaun ne’e ba jornalista sira iha Konferensia da Imprensa, Segunda (22/03) iha nia kna’ar fatin, Fomento-Mandarin, Dili.
Nia hateten, oras ne’e dau-daun governu foin mak iha deit kompanha jogos Lotaria Popular (SDSB) ida, ne’ebe mak legaliza ona nia estatutu no hetan konhesimentu husi governu hodi hala’o operasaun ba jogos Lotaria popular iha teritoriu tomak.
“Kompanha ne’ebe mak manan tender iha primeiru fase ba tenderizasaun jogos Lotaria Popular mak kompanha Rudal 7984. Oras ne’e dau-daun sira hala’o ona operasaun durante fulan 8 (walu) no konsege hatama reseitas ba kofre do estadu hamutuk US$ 28.000,” informa Lobato.
Nia haktuir katak, kompanha Rudal 7984 mos konsege jere osan hamutuk US$ 2 milioens. “Kuandu kompanha barak mak ita bele legaliza, entaun reseitas ba governu sei bele aumenta ba bei-beik no osan ne’ebe mak sirkula iha Timor-Leste bele maka’as liu tan,” tenik nia.
Gabinete Inspeksaun Geral dos Jogos, tuir Lobato, fo nafatin oportunidade ba jogos ilegais (SDSB Singapura) ne’ebe mak oras ne’e hala’o hela operasaun iha Timor laran tomak, atu tuir tenderizasaun hodi hetan lisensa. “Kompanha barak mak durante ne’e ami konsege kaer ou prende sira nia atributus jogos nian no prende mos sira nia osan kuaze US$ 10.000.”
Inspektor ne’ e hatutan, durante hala’o inspeksaun ba jogos ilegais ekipa IGJ servisu hamutuk ho ekipa Polisia Nasional Timor Leste (PNTL) hodi ajuda hala’o inspeksaun iha distritu 13 nia laran.
“Nia rezultadu positivu tebes. Tamba, ami konsege kaer kompanha balun ho inisial hanesan AB, AF no TB. Maibe, kompanha hirka ne’e kontinua nafatin sira nia aktividades. Ho razaun ida ne’e, ami fo oportunidade ba sira tuir Dekretu Lei ne’ebe mak hodi loke tan tenderizasaun ba fase segundu nian,” Lobato hateten.
Tuir Inspektor ne’e katak, jogos ilegais nia ezijensia kontinua aas liu tan, no fo impaktu ba jogos legais hanesan Rudal 7984 ne’ebe mak durante ne’e hala’o operasaun no hetan rekonhesementu husi governo. (Media-MTCI)
