Hasae Kualidade no Kuantidade Produsaun Kafé Timor, MTKI Apoiu Kompania Elsa Kafé
MTCI TIMOR-LESTE
Railaku - Atu hasae kualidade no kuantidade produsaun Kafé Timor molok fa’an iha merkadu, tantu merkado nasional no internasional, presiza tebes situasaun, kondisaun no rekursu humanus, atu oin sa bele prosesa ho didiak kualidade no kuantidade ne’ebe ita hotu espera.
Hatan ba dezafius ne’ebe iha, Governu mak hanesan aman kria situasaun, kondisaun no prepara rekursu humanus atu nune’e bele atinji objetivu ne’ebe iha.
Governu liu husi Ministeriu Turizmu Komersiu i Industria (MTKI), lideradu Ministru Gil da Costa Alves, iha hanoin klean tebes ba dezafiu sira hotu. Nune’e, ho inisiativu hodi fo apoiu ba kompania lokal ho naran Elsa Kafé, Mákina boot produsaun hamutuk 3 ho pakotementu no Mákina natoon 2 atu hamoos Kafé kulit.
Sabadu (10/09), Ministru Turizmu Komersiu i Industria, Gil da Costa Alves offisialmente inagura Edefisiu kompania Elsa Kafé ne’ebe lokaliza iha Sub-Distritu Railaku, Distritu Ermera.
Elsa Kafé durante ne’e koinesidu hanesan kompania ne’ebe halo produsaun Kafé Timor.
Diretur Nasional Industria, Antonio de Araujo esplika, apoiu ne’ebe Governu fo ba Elsa Kafé ne’e ho objektivu atu Elsa Kafé bele hadi’ak liu tan kualidade produsaun Kafé ba Merkado (proses menjadi barang jadi)
Total orsamentu ne’ebe Ministeriu Turizmu Komersiu i Industria liu husi Dirasaun Nasional Industria apoiu ba kompania Elsa Kafé hamutuk kuaze U$D 140 ital mil.
Iha okajiaun inagurasaun Edefisiu Elsa Kafé, Ministru Gil da Costa Alves iha nia intervensaun subliña, apoiu ne’ebe Governu fob a Elsa Kafé tamba iha avaliasaun Elsa Kafé durante ne’e halao ona produsaun Kafé Timor, tamba ne’e, Ministru Gil Alves fiar katak, ho apoiu ne’ebe iha bele hakbiit liu tan Elsa Kafé atu atende nesesidade konsumidores Kafé Timor iha Merkadu.
“Ita nia Kafé Timor iha nia gostu oi-oin, maibe so ita tenki hatene koidadu no prosesa. Maibe hau fiar katak, Elsa Kafé bele halo ida ne’e, no bele hatudu ba Mundu Kafé Timor mak diak liu,” subliña Ministru Gil da Costa Alves.
Entertantu iha fatin hanesan, Responsavel Jeral Kompania Elsa Kafé, Manuel Rocha afirma, preparasaun ba produsaun Kafé iha Timor presiza tebes ho didiak, tamba kualidade Kafé iha Timor diferente, entre Distritus no Sub-Distritu sira.
“Kafé Ermera la hanesan ho Kafé Aileu, hanesan mos Kafé Aileu la hanesan ho Kafé husi Ainaro no Maubisse. Nune’e mos Kafé iha fatin seluk iha Timor laran tomak,” hateten Manuel Rocha.
Manuel Rocha lori komapnia Elsa Kafé nia naran hatoo agradese ba Governu liuliu Ministeriu Turizmu Komersiu i Industria, tamba bele tau atensaun diak ba hasae kualidade no kuantidade Kafé Timor.
Iha biban ne’e, Diretur Nasional Industria, Antonio de Araujo Soares, mos afirma, nia parte sei kontinua fo apoiu nafatin ba aktividade industria tomak iha rai laran, atu nune’e bele kaer metin nafatin kualidade no kuantidade produsaun rai laran molok assesu ba Merkadu. Media MTCI
