MINISTÉRIO DO TURISMO, COMÉRCIO E INDÚSTRIA | MTCI TIMOR-LESTE

DILI-Governu liu husi Ministeriu do Turismo, Comersiu no Industria (MTCI) intrega sertifikadu no ajudus hanesan osan ba partisipante Feira 20 de Maio ne’ebe mak hetan valor diak durante halao feira semana ida iha kampu Demokrasia, Dili (15-21.

Grupo ne’ebe mak mana premiu no sertifikadu mak hanesan Grupo husi Distritu Baucaun ho nia valor 2.135, grupo husi Manufahi ho valor 1725 no grupo husi Aileu ho valor 1720. Ba primeiru lugar sei hetan premiu hanesan osan ho valor US$ 100.00, segundu lugar US$ 50.00 no terseiru lugar US$ 35.00.

Prosesu avaliasaun ne’ebe mak Komisaun organizadora halao, tuir KOordenador Geral, bazeia ba kriterius tolu hanesan, avaliasaun ba baraka/stand ne’ebe involve asuntu dekorasaun, organzasaun espasu no organizasaun ba sasan. Haree mos ba materia ne’ebe mak tau iha stand ida-idak hanesan brosura, spanduk no seluk tan. Kriterius ikus liu mak vigilansia stand, partisipante sira tenki komprende ba materia expozisaun nian, delikadeza iha atendimentu ne’ebe mak diak no unifrome.

Iha deskurusu ba serimonia inseramento, Diretor Nasional Comercio Domestiku Fernando Hi da Silva ne’ebe sai mos hanesan komisaun organizadora husi parte governu hateten, feira ne’ebe mak halao durante semana ida ne’e lao ho susesu no hetan antusiasmu makas husi komunidade iha kapital Dili.

“Feira 20 de Maio 2010 lao ho diak tebes no hetan susesu iha nia realizasaun, grasa ba kontribuisaun no antusiasmo mai husi visitantes sira hotu ne’ebe mak mai visita feira ida ne’e. Tuir ami komisaun oranizadora nia observasaun lor-loron kuaze ema 10.000 mai vista feira ida ne’e,”informa Fernando Hi.

Liu husi feira ida ne’e, Fernando Hi hateten, hetan oportunidade atu konese diak liutan produtus lokais hirak ne’ebe hatudu iha baraka de expozisaun.

“Ita konese ona produtus lokais ne’ebe mai husi distritu ida-idak, hodi bele hatene distigue no fo valor ba ita nia rai nia produtus rasik, no ita hatudu duni ida ne’e,” Nia apresia.

Antes atu taka nia deskursu Fernando Hi, hatoo mos agradese ba parseiru ne’ebe mak durante fo ajudus hodi feira ida ne’e bele lao ho susesu.

“Feira ida ne’e sei la susesu karik laiha kontribuisaun husi Autoridades distritais, komisaun organizadora no koordenador geral, Asosiasaun Comercial da Comunidade Chinese Timor Oan no mos empresas ne’ebe mak relevante no la haluha mos ba kontribuisaun husi Polisia Nasional Timor Leste ba area seguransa nian,”agradese Fernando.

Partisipante ne’ebe mak partisipa iha feira ida ne’e, senti haksolok no husu ba governu atu kontinua halao feira ida ne’e no husu atu habelar feira ida ne’e iha distritu 13 nia laran. Tamba tuir partisipante sira katak, feira ida ne’e sai mos hanesan kampu de servisu ida ba sira tamba liu husi feira ida ne’e sira bele hetan rendimentu oituan husi produtus ne’ebe mak sira faan.

Alende ne’e mos visitantes sira mos husu ba governu atu kontinua halao animasaun ba populasaun liu husi programa feira, tamba tuir sira katak, atraves de feira ida ne’e Timor oan mos bele halibur aan no hanesan mos fatin animasaun ba joventude, familia no mos ba labarik sira.

Partisipa iha enseramentu feira ida ne’e, empresarius, korpus diplomatikus no parte governu no inklui mos komunidade kapital Dili. (Media-MTCI)