MINISTÉRIO DO TURISMO, COMÉRCIO E INDÚSTRIA | MTCI TIMOR-LESTE

Maubara- Ministeriu Turismo, Comersiu no Industria servisu hamutuk ho USAID no Coperativa Mós Bele organiza segudu Feira Maubara ne’ebe mak halao iha Maubara, Likisa Sabadu (08/05). Eventu ne’e hanesan parte ida hodi fo mercado ba produtus lokal no dalan ida atu promove diak liutan produtus lokal ne’ebe mak industria kiik sira produs.

Eventu ida ne’e hanesan mos programa anual husi MTCI ne’ ebe responsabiliza husi Diresaun Nasional Industria, ne’ebe durante ne’e suporta industria kiik iha distrtiu 13 nia laran. Iha feira loron ida ne’e, grupo industria kiik hamutuk 20 ne’ebe mak maioria grupos artesenatos ne’ebe mak partisipa, hetan oportunidade hanesan atu hatudu produtus ne’ebe mak sira produs no halao mos demostrasaun ba prosesu oinsa halo produtus hirak ne’e.

Presidente da Republika (PR) José Ramos Horta ne’ebe mak halao visita ba feira ida ne’e akompanha husi Ministru Economia e Dezenvolvimento (MED) João Gonçalves, senti haksolok tamba produtus ne’ebe mak Timor oan produs komesa iha nia kualidade.

“Timor oan sira ohin loron komesam kreativu liutan, no produtus barak iha mudansa no nia kualidade kapas liutan,”dehan Presidente da Republika.
Horta mos apresisa tebes ba grupo joventude balun ne’ebe mak involve aan iha grupos koperativa ne’ebe mak esforsu aan makas hodi promove no dezenvolve produtus lokal.

“Hau apresia ba joventude balun ne’ebe mak hakarak kontribui ba nasaun ne’e liu husi harii koperativas hodi hatudu kreatividades ne’ebe mak sira iha,”apresia PR.

Presidente reforsa katak, produtus artesenatos ne’ebe mak Timor oan produs hetan atensaun makas husi nasaun sira seluk tamba sai hanesan produtus ne’ebe mak uniku liu.

“Wainhira hau halao viagen ba nasaun liur, hau sempre lori ita nia produtus hanesan Tais, Kafe hodi hatudu ba boot sira iha liur no sira hakfodak tebes ho produtus ita nian. Hau mos lori ba Los Angeles no Hollywood no ita nia produtus hirak ne’e hanesan tais konesidu tebes ona iha mundu. Sira apresia tebes ba Tais Timor nian ne’ebe mak uniku tebes,”dehan Horta.

Neneik-neneik tuir Horta, industria kiik sira bele melhora diak liutan produtus lokal. No governu liu husi programa Luta Contra Pobreza fo atensaun tebes ba produtus lokal hodi haruka ema barak halao kursus iha nasaun liur ne’ebe mak nia iha esperiensia diak tebes kona-ba hadia kualidade produtus.

“Iha futuru Timor nia produtus iha kualidade diak liutan duke sasan ne’ebe mak importa husi nasaun liu ne’ebe mak laiha kualidade. Tamba ita nia produtus ne’e tama ona iha mercado Portugal, Australia no nasaun seluk. Ita tenki apresia ba ita nia produtus rasik,”informa PR.

Presidente Horta mos husu ba industria kiik Timor Leste atu esforsu makas hodi hadia kualidade produtus hodi bele kompete ho produtus husi nasaun seluk.

“Iha fulan oin mai Timor Leste sei partisipa iha Expozisaun Shanghai-Cina. Ne’e hanesan oportunidade diak ba ita atu hatudu ba mundu saida mak Timor Leste iha. Husi eventu ida ne’e mundu bele konese produtus lokal Timor Leste nian ne’ebe la sees mos husi produtus sira seluk,”haklaken Presidente.

Iha oportunidade ne’e mos, Presidente da Republika, hatoo parabens ba industria kiik Timor Leste ne’ebe mak maske iha limitasaun barak maibe kontinua esforsu aan makas hodi promove no dezenvollve produtus lokal.

“Hau mos apresia tebes ba industria kiik sira maske sira mana osan kiik husi faan produtus lokal no gasta energia barak maibe sira kontinua esforsu aan makas hodi dezenvolve. Tamba estadu sei kontinua tulun no buka dalan ba sira nune’e sira nia produtus bele dezenvolve laos deit iha mercado nasional maibe mos tama iha mercado internasional,”dehan PR.

Iha fatin hanesan mos Ministru Economia no Dezenvolvimentu konvida koperativas ne’ebe mak ladauk hetan suporta husi governu liu-liu MED atu registu iha MED nune’e bele hetan kapasitasaun no hetan oportunidade atu tuir mos kursu iha nasaun Indonezia (Bali) nune’e bele hadiak liutan kualidade produtus artesenatus.

Alende ne’e mos, partisipante ne’ebe mak partisipa iha eventu ne’e, agradese ba governu liu husi Ministeriu Turismo, Comersiu no Industria no nia parseiru ne’ebe mak iha hanoin diak hodi organiza eventu hirak ne’e, tamba liu husi eventu refere alende bele fo oportunidade ba sira hodi halao promosaun ba produtus lokal maibe mos fo tempu mos ba sira hotu hetan rendimentu oituan husi produtus ne’ebe mak sira faan iha feira refere.

Partisipa iha feira ida ne’e, Presidente da Republika Jose Ramos Horta, Ministru Economia e Dezenvolvimentu Joao Gonçalves, Embaxadores iha Timor Leste, populasaun no mos komunidade estrangeirus. Feira ne’e alende halao promosaun ba produtus lokal hetan mos animasaun husi grupos banda lokal no mos apresenta animasaun ba labarik sira. (Media-MTCI)