Komemora Loron 20 de Maio, MTCI no Asosiasaun Comersial Comunidade Xineses Organiza Feira Nasional
MTCI TIMOR-LESTE
DILI-Hodi komemora loron restaurasaun da independensia Timor Leste nian ne’ebe mak monu iha loron 20 de Maio, Ministeriu Turismo Comersio no Industria hamutuk ho Asosiasaun Empresarius Xineses organiza eventu feira nasional ne’ebe mak halao iha kampu Demokrasia iha loron 15-21 de Maio.
Eventu ida hanesan parte ida hodi anima komunidade iha sidade Dili no mos halao promosaun ba produtus lokal ne’ebe mak povu agrikultores produs.
“Objetivu seluk husi expo ne’e atu foo konese produtu lokal para hasae produsaun hodi hatudu ba mundu katak, Timor Leste iha nian produtu,”dehan Presidente ACCCTO Lay Sio iha nia deskursu ba abetura Expozisaun refere.
Iha fatin hanesan mos, Vise Primeiru Ministru asuntu Sosial, Jose Luis Guterres hateten, expozisaun ne’e importante hodi hatudu ba mundu ita saida mak Timor Leste iha.
“Politika ne’e importante hodi insentiva produsaun lokal nian. Hadia ita nia produtus atu nune’e aban-bainrua kuandu kuandu ita nia Turismo deznvolvidu ona, ema barak husi rai liur bele sosa ita nia produsaun ne’ebe mak ita niapovu produs,”dehan Jose Luis.
Alende ita tau matan ba produtus lokal artesenatus, Timor Leste mos bele transforma produtus produtus industriais hodi bele halao exportasaun ba rai liur.
Razaun tamba sa mak expozisaun la halao iha antigu Mercado, Vise PM ne’ehatete, komesa iha fulan kotuk ba, antigu mercado ofisialmente sai ona centru konvensaun internasional tamba ne’e governu deside hodi halao fali expozisaun iha kampu demokrasia hanesan centru de sidade.
Entertantu Komisaun Organizadora Fernando Hi da Silva iha nia relatoriu badak hateten, feira 20 de Maio hanesan programa permanente MTCI nian ne’ebe mak halao tinan-tinan hodi komemora loron restaurasaun da independensia ba dala walu.Ba tinan ida ne’e, MTCI hili topiku ida hanesan “Uza Produtus Rai Laran Haburas Moris Diak,”.
“Obejtivu mak atu promove no fo valor ba produtus lokais nu’udar eventu ida ne’ebe halo ligasaun investimento interno no investimentu externo, hodi bele promove setor hanesan Turismo, Comercio, Industria no seluk tan,” dehan Fernando Hi ne’ebe mak kaer pasta hanesan mos Diretor Nasional Comercio Domestiku.
Objetivu seluk tuir Fernando Hi katak, hodi anima populasaun iha kapital Dili ba loron espesial 20 de Maio. Tuir nia katak, hodi eventu ida ne’e lao ho diak MTCI mos hetan suporta husi Setor Privado no mos ministeriu sira seluk. MTCI fo fiar ba setor Privado hodi intrega responsabilidade sai nu’udar organizador ba aktividade iha dezenvolvimentu, tamba ne’e MTCI involve ona setor privado iha programa MTCI nian.
“Setor Privado nu’udar pilar ida, ih adezenvolvimentu Nasaun ida ne’ enia laran, partisipasaun sira nia importante tebes ba eventus ne’ebe iha relasaun kona-ba promosaun Timor Leste atu hametin investimentu ba Turismo i no mos fo sai ba mundu atu knese diak liutan Timor oan nia produtus, kultura no seluk tan,”informa Fernando.
Tuir relatoria ne’ebe mak iha total orsamentu ne’ebe mak utiliza hodi halao eventu ida ne’e hamutuk US$ 50.000.00. no osan ne’ebe mak suporta husi Asosiasaun Comercial Comunidade Xineses Timor oan hamutuk US$ 49.000.00 ne’ebe mak kompleta osan hamutuk 99.800.00.
Baraka ne’ebe mak MTCI prepara hamutuk 43 ne’ebe mak prienxe husi grupos industria kiik no mos Ministeriu Economia e Dezenvolvimentu, Ministeriu da Edukasaun, Ministeriu Argikultura no Peskas, Ministeriu Saude ne’ebe hatudu servisu ne’ebe mak sira halao durante ne’e. Partisipante indutria kiik sira mai husi distritu 13 nia laran ne’ebe mak lori sira nia produtus lokais hanesan artesenatus, hahan tradisional no mos produtus ba mikro industria nian.
Partisipante iha expozisaun ida ne’e mak hanesan, Vise Primeiru Ministru asuntu Sosial Jose Luis Guterrese, Corpus Diplomatiku no jogador ekipa Clubu Futebol Benfica Portugal Nuno Gomes ho nia komitiva. expozisaun ida ne'e mos hetan visita husi Presidente da Republika Jose Ramos Horta. (Media-MTCI)
