MINISTÉRIO DO TURISMO, COMÉRCIO E INDÚSTRIA | MTCI TIMOR-LESTE

LACLO – Governo IV Konstitusional ne’ebe lidera husi Primeiru Ministru Kay Rala Xanana Gusmão, sempre buka nafatin solusaun para bele resolve problema sosiais iha rai laran. Liu-liu ba invalidos no idozos, para sira mos bele sente moris iha tempu Ukun Aan.

Ministru Turismo, Comerciu no Industri (MTCI), Gil da Costa A.N Alves, hatete lia hirak ne’e, wainhira hasoru malu ho ferik no katuas sira iha Aldeia Ilimanu, Laclo Vila no Reabuticeo, Sub-Distritu Laclo, Distritu Manatuto, durante loron tolu (27-29 Abril). MTCI hala’o visita ba aldeia tolu ne’e relasiona ho aktividade reajustamentu ba invalidos no idozos iha distritu refere.

Tuir MTCI, prosesu ne’ebe agora STAE hamutuk ho ekipa Ministeriu Solidaridade Sosial (MSS) no Minsteriu Saúde (MS) hala’o, hanesan parte ida husi atensaun governu ba ferik no katuas sira.

“Nu’udar Xefi Governu, Primeiru Ministru Xanana Gusmão hakarak ema hotu-hotu iha nasaun ida ne’e bele sente ho Ukun Aan. Mais um menus, bele goza oituan iha sira nia vida lor-loron. Tan ida ne’e, Primeiru Ministru obriga ministru no ministra sira tuun hotu ba baze, para bele haree no akompanha besik liu tan prosesu reajustamentu ba invalidos no idozos sira,” hateten Ministru.

Iha aldeia tolu ne’e, ministru TCI ne’ebe akompanha husi Direitor STAE, Tomas Cabral no Administrador Distritu Manatuto, Elvino Bonaparte husu mos ba ferik no katuas sira, para hatudu dadus kompleta no los. “Governo rekonhece katak ema barak mak sei triste tamba dadus seidauk los. Tan ida ne’e, sei iha tempu iha semana rua nia laran para bele resolve problema hirak ne’e,” dehan ministru.

Hatan ba preokupasaun juventude iha Aldeia Reabuticeo tamba to’o agora seidauk hetan atensaun husi governo, Ministru Gil hatete, komponente hotu-hotu iha nasaun ida ne’e, sei hetan valor ba sira nia luta. “Tan ida ne’e, lalika laran taridu tamba sei iha ajuda ba joven aswain sira,” dehan ministru TCI.

Maske nune’e, ministru fo hanoin ba joventude sira atu labele hein deit buat ida atu mai. Mais, tenki haforsa aan nafatin para bele servisu maka’as liu tan, iha ida-idak nia vida loro-loron.

Ministru Gil Alves mos fo parabens no agradece ba ekipa husi STAE, Saúde no MSS tamba esforsu ne’ebe sira hala’o durante ne’e.

Fos MTCI
Hatan konaba problema fos MTCI ne’ebe to’o agora seidauk to’o iha baze, Ministru Gil hatete MTCI sei uza mekanismu foun para bele atende fos ba komunidade ne’ebe kbi’it laiha para sosa fos.

“MTCI sei tula rasik fos to’o sub distritu ne’ebe iha asesu dalan diak. Fos hirak ne’e sei fa’an iha kios ka loja ne’ebe hetan autorizasaun husi MTCI. Ho ida ne’e, preokupasaun konaba folin ne’ebe durante ne’e hetan manipulasaun husi espekulantes sira, bele resolve,” hateten ministru.

Durante ne’e, prosesu distribusaun fos MTCI hetan intervensaun maka’as husi espekulantes sira iha Dili. “Sira lori xefi suku nia naran ho dados para bele hetan atendementu husi armajem MTCI. Mais realidade, fos hirak ne’e sira fa’an fali iha estrada ninin iha Dili laran,” ministru esplika.

Ho atetude husi espekulante sira ne’e, Ministru husu ba autoridade lokal atu tau matan no toma atensaun ba hahalok ida ne’e. “Fos MTCI fa’an ho folin $ 12 Amerikano kada saka 35 kilograma. Se iha ema balun fa’an ho folin liu husi presu ne’ebe determina tiha ona, hau husu ba autoridade lokal servisu hamutuk ho PNTL para halo kedas intervensaun,” nia sujere.

Ministru Gil Alves mos informa, la kleur tan MTCI sei fa’an fos ho folin $ 9 Amerikano kada saka 25 kilograma. MEDIA-MTCI