Grupo Feto Rurál Husu Governu Fo Atensaun Dezenvolve Produtus Lokál
MTCI TIMOR-LESTE
DILI-Grupo feto rural ne’ebe halao atividade dezenvolve produtus local husu ba governu atu tau atensaun ba sira nia kondisaun hodi bele tulun kapasita sira.
Membru grupo feto rural Bebola-Sanan Rai husi distritu Oe-cusse, Francisca Nohek hatete, atu dezenvolve diak liu tan atividade grupo feto iha area promosaun produtus local, governu tenke tau atensaun.
“Nu’udar feto rural ne’ebe halao atividade produs sasan rai, buli, kaneka no vazu husi rai mean senti kontenti tanba ho kapasidade ne’ebe iha, ami bele halao buat ruma ba dezenvolvimentu,”dehan Nohek ba STL iha Dili, Tersa (20/10).
Nia afirma katak, governu tenki fo tulun finanseiru hodi alkansa liu tan atividade grupo feto rural nian.
Kestaun hanesan mos informa husi xefi Hadomi Produtus Lokal, Alsina Maria, wainhira governu tau atensaun maka feto iha kbiit naton ona para produs nia atividade hodi promove produtus local.
Nia suzere ba govenu atu kria kondisaun treinamentu iha area jestaun no kreatividade ba feto rural hodi bele aumenta diak liu tan sira nia kapasidade no konesimentu.
Antes ne’e, Ministru Agrikultura no Peskas Mariano Assanami Sabino hatete, ema hotu tenki suporta feto rural ba dezenvolvimentu industria nian, tanba ho produtus local ne’ebe sira produs bele dezenvolve industria iha rai laran no suporta ba rai liur. (mik)
Jornal Nasional STL,
Edisaun Kuarta-Feira (21/10), Pagina 4
