MTCI-MAP-MED Implementa Ona Progama “Suku Ida Produtu Ida”
MTCI TIMOR-LESTE
DILI- Movimentu “One Village One Product” ka Suku Ida Produtu Ida (SIPI) ne’ebe hetan suporta husi JICA no governu Timor Leste (TL) liu husi Ministeriu Turismo, Comersiu no Industria (MTCI), Ministeriu Agrikultura no Peskas (MAP) no mos Ministeriu Ekonomia no Dezenvolvimentu (MED), implementa ona iha Timor Leste.
Tuir komunikadu imprensa husi governu ne’ebe Timor Post hetan asesu, Tersa (20/10) horseik, katak atividade konkoretu marka tiha ona liu husi vizita husi peritu sira Thailand nian kona-ba OTOP (One Tambon One Product) mai TL iha fulan Fevereiru 2009.
Tuir fali maka vizita ka estudu komparativu husi Timor oan nain 19 ba Thailand iha fulan Marsu 2009 atu aprende kona-ba atividade OTOP nian iha provinsia balun iha Thailand.
Husi loron 13-21 Outubru 2009 peritus OTOP nain rua (2) husi Thailand ne’ebe haruka husi Departamentu Agrikultura Tailand visita grupus Alvus SIPI nian balun iha distritu Baucaun no Bobonaro.
Atu resumi sira nia visita no observasaun tomak , sei halao seminariu OTOP iha Hotel Timor iha Tersa-Feira 20 Outubro 2009.
Objetivu seminariu ne’e mak aatu fo sujestaun ba grupus alvus SIPI nia atu bele hadiak kualidade produtus no mos avalia atividade SIPI nian durante fulan hirak liuba.
Partispaante seminariu ne’e mak hanesan Sekretariu Estadu de Agrikultura e Arborecultura, Diretores no Ofisiais husi Ministeriu Agrikultura no Peskas, Ministeriu Ekonomia no Dezenvolvimentu, Ministeriu Turismo, Comersiu no Industria, ajensia internasionais, Membrus JICA no reprezentante husi SIPI ninian grupus alvus sira husi distritu Baucau no Bobonaro.
Partisipante husi grupus alvus espera katak, Seminariu ne’e sei fo ideias no matenek ba grupu SIPI iha TL, atu hametin dezenvolvimentu ekonomia iha area rural liu husi atividades ne’ebe sira halao. (mj2)
Jornal Nasional Timor Post.
Edisaun Kuarta-Feira (21/10), Pagina 7
