Tinan 2010 MTCI Sei Hadiak Tan Fatin Rekreativu
MTCI TIMOR-LESTE
DILI-Xefe Departamentu Infrastutura no Politika Turismo nian, Carme Joela Pereira hateten katak, iha tinan 2010 sei hadiak tan fatin rekreativu nian iha teritoriu hotu nune’e atu bele fasilita ema sira ne’ebe hakarak halo pikiniki (Rekreasi).
Carmen kasu lia hirak ne’e ba jornalista Timor Post, Kinta (08/10) horseik iha nia knar fatin, Fomento Dili.
Carmen hateten, planu atu hadiak fatin rekreativu hanesan tau uma oan iha area tasi ibun no mos toilet no mos fatin ba mini market hodi nune’e bele fo benefisiu ba ita nia povu sira ne’ebe hela besik fatin hanesan area Praia Behau, Area Branca, no Pantai Kelapa.
Xefe Departamentu ne’e mos konfesa katak, kompania Pelican Paradise iha tinan 2010 sei harii Resort 5 Estrelas iha area Tasi Tolu ne’ebe sei hahu iha tinan oin. Agora dadaun iha Cristo Rei nia okos ne’e komesa harii ona parede, ne’ ehanesan kontinuasaun husi programa 2008 nian.
“Iha jardin Borja da Costa ne’e ita komesa halao renovasaun. Ita mos sei harii One Dollar Beach iha area Ilimanu no iha Atauru hanesan fase kontinuasaun ba Pousada no sei haree mos ba nai manutensaun ba Bee mos,”dehan Carmen.
Nia informa liu tan katak, agora dadaun halo iha areia branca ne’e husi Timor Plaza rasik mak sei halao projetu ne’e.
Kona-ba estimasaun ba Turista ne’ebe mai iha Timor, Carmen informa katak, besik 23.000 turista mak kada tinan mai visita Timor. Hahu husi fulan Janeiru mai too iha fulan Maio nia laran.
“No agora dadaun MTCI kolabora ho imigrasaun Aeroportu atu nune’e bele tau mos sira nia fomulariu ba iha fatin entrada Turista nian nune’e it abele identifika loloos ba turista sira ne’ebe tama iha Timor Leste,”tenik nia.
Nia mos informa katak lei Draff Turismo nia halo pronto tiha ona presiza atu halao tradusaun.
“Agora sei tradus tamba lei sira ne’e iha lian ingles hela. Ne’e duni iha fulan Novembru mai MTCI sei halao Workshop ida sobre ba lei do Turismo,”informa Carmen. (mj2)
Jornal Nasiona Timor Post,
Edisaun, Sesta dia 09 de Outubru de 2009, Pagina 06
