Presu Foos Lao Normal, Komunidade Kontente Ho servisu MTCI
MTCI TIMOR-LESTE
DILI- Komunidade capital Dili sente kontente, tamba iha merkadu ka loja foos ho marka MTCI komesa faan ho presu normal ($ 12.00) kada saka 35kg. kompara ho semana hirak liu ba folin foos MTCI aas liu $ 20 too $ 25 dolar kasa saku.
Alexandre de Araujo komunidade Bairo Pite Maria dos Reis iha Hali-Laran, Domingos Magno iha Taibessi haktuir lia hirak ne’e ba jornalista Diariu iha sira ida-idak nia fatin Kuarta (7/10).
Tuir populasaun sira ne’e katak, durante semana hirak nia laran, foos iha fatin hotu iha capital Dili iha loja ka kius hotu mamuk. Ho ida ne’e halo komunidade tomak triste, laos deit komunidade iha capital Dili maibe iha distritu mos infrenta defikuldades refere. Maibe liu loron hirak deit MTCI komesa hamosu regulamentu foin hodi hadia sistema distribuisaun foos.
“Governu rona duni povu nia lian. Durante foos folin karung povu sira halerik ba governu liu-liu Ministeriu Turismo, Comersiu no Industria. Liu husi media povu sira hatete katak, governu sira la servisu no sira laiha kontrolu ne’ebe mak diak. Maibe liu tiha loron hirak deit foos komesa nakonu fali iha capital Dili ho presu ne’ebe mak normal,”dehan Alexandre de Araujo.
“Hau kontente ba servisu governu ida ne’e nian. Ne’ebe tau matan duni ba povu nia susar. No hau espera situasaun ne’e sei kontinua nafatin ba future,”espera nia.
Maria dos Reis komunidade Taibessi haktuir katak, husi nia parte senti kontente ba foos MTCI tamba komesa fali ho folin ne’ebe bratu no nia distribuisaun lao ho diak tebes.
“Presu foos governu lao normak ami komunidade mos komesa laran kmaan oituan,”dehan nia.
Iha fatin hanesan mos Domingos Magno agradese ba MTCI tamba durante MTCI hapara intervensaun iha Mercado sira tenke han loron ida dala ida deit no dalaruma sasoro deit. Maibe wainhira foos nia presu lao normal sira loron id abele han dalda tolu.
“Hau senti kontente tamba governu rona duni ami povu kiik no kiak nia halerik hodi husu ba governu atu kontrola folin foos ne’ebe mak governu subsidia ba povu. No iha realidade agora kios/ loja hotu foos barak no nia folin normal fila fali,”agradese Domingos. (I-3)
Jornla Nasional Diariu. Kinta 08 de Outubro de 2009
Pagina 05.
