Gil Alves : Carnaval Maka Promove Kultura TL
MTCI TIMOR-LESTE
DILI – Ministeriu Turizm, Comersiu no Industria (MTCI) Gil Alves hateten ho carnaval maka bele promove lilu tan kultura Timor Leste sai kunesidu iha mundu internasional.
“Ho carnaval ne’ebe mak ita halao dadaun ne’e bele promove liu tan kultura TL nian ba iha mundu internasional katak maski Timor Leste rai ida ki’ik maibe ninia kultura uniko tebes iha mundo,” dehan Gil Alves ba jornalista sira iha nia knar fati, Segunda (15/02).
Tuir nia katak carnaval tinan ida ne’e organizadu tebes no diferente tebes ho tinan kotuk yanba partisipa husi grupo 68 (neen nulu resin walu) ne’ebe husi distrito 13 (sanulu resin tolu) no mos husi komunidade estranjeirus husi Brazil, Cuba, no Australia.
Entrenatu, Xefe Departementu Arte Kultura Eugenio Sarmento hateten objetivu atividade carnaval maka manifesta kultura oin-oin husi distritu tomak no husi komunidade internasional sira, maibe la signifika katak ho manifestasaun ne’e atu halakon trdisaun Timor.
“Objetivu husi eventu carnaval maka haburas liu tan ita nia kultura nune’e halakon rai odio ba malu,” nia tenik.
Iha fatin hanesan, Reprezentante Carnaval Distritu Baucau Antonio Guterres hatete katak sira senti kontente tebes ho programa ida ne’e maski foin primeira ves partisipa iha carnaval.
“Ita tenki hametin nafatin ita nia kultura iha kualker eventu atu nune’e ita nia kultura sai morin liu tan iha ema seluk ne’ebe mak la adopta tradisaun Timor nia let,” nia dehan.
Alende ne’e, Reprezentante Carnaval Distritu Viqueque Amandio dos Santos informa katak ema barak maka lakohi atu dezenvolve tradisaun ka kutura Timo tamba nia hare nomos katak grupo sira ne’ebe partisipa carnaval barak mak la hatais roupa kultura Timor nian.
“Ita tenki hametin nafatin kultura ne’ebe mak ita nia beiala sira husik hela mai ita nune’e tradisaun ne’e buras nafatin,” nia sublinha. (uly)
