Promove Kultura, MTCI Organiza Segundu Karnaval
MTCI TIMOR-LESTE
DILI- Ministeriu Turismo,Comersiu no Industria (MTCI) liu husi Diresaun Nasional do Turismo (DNT) organiza eventu Karnaval ne’ebe mak sai hanesan programa annual diresaun ida ne’e nian. Eventu karnaval ne’e sei halao iha loron 14-15 fulan Fevereiru ne’e.
“Eventu loron karnaval ne’e hanesan segundu fase, tamba iha tinan 2009 ami halao tiha ona iha ba iha tinan ida ne’e mos ami kontinua nafatin tamba programa ne’e tama ona iha programa annual ami nia ministeriu nian atraves de Diresaun Nasional Turismo,”dehan Diretora Geral MTCI, Dra. Manuela G.B. Corte-Real iha koferensia da emprensa horseik (10/02) iha edifisiu Fomento Mandarin Dili.
Tema geral ba eventu Karnaval tinan ida ne’e mak “ Alegria na Liberdade no Pluralidade,”. Diretora Geral ne’e inform tan katak, objetivu principal husi eventu karnaval ida ne’e maka, fo oportunidade ba maluk sira hotu liu-liu juventude Timor tomak, atu espresa sira nia kreatividade liu husi espresaun cultural jerasaun foun nian maibe tenki kaer metin nafatin kultura Timor nian.
“ita nia kultura husi Distritu 13 ne’e la hanesan, entaun ita halo oinsa atu promove liu husi oportunidade ida ne’e. Ajuda juventude hasai espresasaun ba ita nia kultura, haforsa unidade entre Timor oan no komunidade internasional. no eventu ida ne’e, importante tebes oinsa atu atria turista sira tama barak liu mai Timor Leste,”esklarese Manuela.
Eventu ida ne’e sei partisipa mos husi komunidade internasional ne’ebe mak iha Timor Leste liu husi embaxadas sira.
Total orsamentu ne’ebe mak aloka ba eventu ida ne’e hamutuk US$ 3 Mil no hetan mos apoiu husi empresarius balun ho total orsamentu US$ 18 mil.
Alende hetan apoiu masimu husi emrpesairus, eventu ida ne’e hetan mos apoiu husi Ministeriu balun hanesan MInisteriu Estatal Ministeriu Infrastutura, Ministeriu Saude, Sekretariu Estadu Kultura, no mos Sekretariu Estadu Seguransa.
“Ami hetan mos apoiu finanseiru balun husi operador Rotaria Popular, Timor Telekom, GRafika Conoco Philips, empresarius grupu feto no mos suporta husi embaxador Brasil iha parte Dekorasaun nian,”dehan nia.
Eventu karnaval iha tinan ne’e sei hetan deferensia oituan husi tinan kotuk, tamba sei hetan partisipasaun masimu husi grupu kultura iha distritu 13 nia laran. Total grupu ne’ebe mak regista ona hamutuk 60 no total ema ne’ebe mak sei partisiap hamutuk 1600.
Embaxadas iha Timos Leste sei organiza sira nia komunidade ne’ebe mak halao knar iha TL atu partisipa iha eventu especial ida ne’e, hanesan embaxada Brasil, Australia, Portugal no Cuba.
Presidente Komisaun Organizadora ne’ebe hanesan mos Diretor ba Diresaun Nasional do Turismo Jose Filipe Dias Quintas, haforsa tan katak, iha eventu ida distritu 13 sei hatudu ida-idak nia kultura hanesan hatais, bidu tebedai no seluk tan.
“Timor Leste maioria relijiaun Kristaun Katolika, entaun labele hatudu buat hanesan hatais karnaval husi nasaun seluk ne’ebe modern maibe mantein nafatin ita nia kultura,”Jose afirma.
Festa karnaval ne’e sei hahu iha 14 de Fevereiru ne’ebe sei komesa husi Ginasiu Dili no sei iha festa karnaval iha kalan, no iha loron 15 de Fevereiru sei lao hamutuk husi edifisiu Ministeriu Negosiu estrageirus Pantai Kelapa too iha GMT. (Media MTCI)
