MTCI Kunvida 12 Distritus Involve Iha Karnaval 2010
MTCI TIMOR-LESTE
Dili – Ministeriu Turismo, Comersiu no Industria liu husi diresaun nasional do turismo organiza segundu karnaval” alegria iha liberdade no pluralidade 2010 ne’ebe sei fo oportunidade bo’ot ba kretividade liu husi ekspresaun kultura jerasaun foin sae sira nian.
Directora Geral Ministeriu Turismu, Comersiu no Industria Manuela G.B. Corte-Real iha salaun MTCI, Fomento, Dili, Kuarta (10/02) liu husi nia intervensaun hatete, objetivu husi karnaval ne’e atu fo oportunidade ba jovem timor oan no komunidade internasional.
Nia informa, eventu ne’e importante atu maluk timor oan hotu partisipa no halo parte, basaa eventu ida ne’e hanesan eventu anual hodi atrai turista lokal no mos turista husi rai liur. Karnaval iha tinan ne’e involve hotu distritu sanulu resin rua hola parte, la hanesan tinan kotuk distritu la hola parte.
Antes atu halo parade karnaval, iha 14 kalan sei iha festa karnaval ne’ebe lokaliza iha gimnasio Dili. Parade karnaval sei lansa iha 15 fevereiro horas 13:00 lokraik, ho nia rute hanesan husi ministeriu do negosiu estrangeiro nia oin no remata iha stadion Dili ne’ebe sei foti dalan husi eis Hello Mister.
Iha fatin hanesan Diretur Nasional Do Turismo, Jose Quintas hatete, eventu ne’e dirasaun nasional do turismo hetan suporta maka’as husi ministeriu seluk hanesan ministeru Infrastrutura, Saude, Estatal, Sekretariu Estadu da Kultura, Seguransa no seluk tan. Alende ne’e hetan mos tulun finanseiro no material husi sektor privadu hanesan operador lotaria popular, Timor Telecom, Grafika Patria, Montana Diak, ConocoPhilips, Emprezarius grupo feto no suporta mos husi embaixada Brazil iha parte dekorasaun.
Nia hatete, eventu karnaval iha tinan ida ne’e diferente ho tinan uluk. Parade kultural mak sai hanesan objetivu prinsipal ne’ebe sei involve grupus kulturais husi distritu hotu. Liu tiha ona partisipante grupus 60 mak registu tiha ona, ne’ebe hamutuk ema 1600.
Husi embaixada Australia, Brazil no Cuba sei organiza sira nia komunidade ne’ebe hela ou servisu iha TL atu partisipa mos iha parade ne’e i nomos suporta ba eventu ida ne’e.
Iha parte seluk marsia membru grupo Cicani ne’ebe mak involve iha eventu ne’e hatete, senti kontente tebes ho programa ne’ebe mak governo liu husi MTCI hodi kria eventu ne’e fo oportunidade tebes ba jovem timor oan tomak para oinsa bele hatudu no aprejenta sira nia kultura ba mundo internasional hodi nune’e hatudu ba mundo katak jovem TL mos bele promove sira nia kultura liu husi sira nia musika. mik/fal
