Governu Hasai Tan U$ 18 Miloens Hola Fos
MTCI TIMOR-LESTE
Carrascalao : “La Liu Husi Tender”
Governu liu husi konselhu ministru aprova hasai osan U$ 18 atu hola tan fos toneladas rihun 30, tamba stock fos ne’ebe oras ne’e iha armazen governu menus ona.
Desizaun konselhu ne’e ho urjensia tamba hetan proposta husi Ministeriu Turizmu Comercio no Industria (MTCI), Gil da Costa Alves, katak stock fos sei hotu iha Marsu oin mai.
Abastesimentu estratejiku nasional fos ne’ebe sei jere direitamentu husi MTCI, Gil Alves ne’e, Vice Primeriu Ministru (PM) mak trata ba assuntu administrasaun, Mario Viegas Carrascalao afirma, sei la loke tender ba emprezarius atu halo importasaun tamba governu mak direitamente bele lalais I laiha problema.
“Governu importa direitamente la liu husi emprezariu, bele lalais, laiha problema. Tamba ita hatene katak governu mos konfiksa hela besik 10 mil toneladas fos ne’ebe tinan uluk tama, agora tau hela armagen la hasai to’o a’at deit ne’e buat ida ke problema,” lamenta Vice PM Carrascalao.
Maske nune’e tuir planu, prosesu hola fos toneladas rihun 30 ne’e sei importa toneladas rihun 10 kada fulan to’o Abril.
“Antisipasaun abastesimentu nian ida ne’e ho hanoin atu prevene ruptura ba stock fos nian ne’ebe bele mosu iha tempu oin mai iha pais ne’e,” haktuir karta komunikadu ba imprensa ne’ebe dirize husi konselhu ministru ba Diario ne’e, Tersa (02/02) horiseik.
Oras ne’e dadauk governu liu husi MTCI halo hela negosiasaun ba folin fos ho nasaun ne’ebe fos folin menus.
Nune’e, Diretora Geral do MTCI, Manuela G.B Corte-Real ba Jornalista sira iha nia servisu fatin esplika, husi montante U$ 18 miloens ne’ebe iha , bele hola fos liu toneladas rihun 30, wainhira negosiasaun la hetan fos folin karun. N-2
