MINISTÉRIO DO TURISMO, COMÉRCIO E INDÚSTRIA | MTCI TIMOR-LESTE

DILI-Ministru Turismo, Comersiu no Industria Gil da Costa Alves sei fo blacklist ba Empresarius ne’ebe mak halao manipulasaun ba presu foos MTCI iha Mercado.
Kestaun ne’e nia informa wainhira halao sorumutu hamutuk ho Administrador Distritu 13, komandante Polisia husi Distritu no Sub-Distritu hotu, xefe suku no aldeia hodi simu orientasaun ba medidas ne’ebe mak sei foti wainhira empresarius balun halao manipulasaun ba presu foos MTCI.
“Ami apela nafatin ba empresarius ne’ebe sosa foos depois manipula nia presu iha Mercado husi 12 dolar ba 13-20 dolar ami sei fo Blacklist,”apela Ministru Gil.
Iha sorumutu ne’e Ministru Gil akompanha husi Sekretariu de Estadu Seguransa Francisco Gutteres, Ministro Estatal no Ordenamentu do Teritoriu Arcanjelo Leite, Adjunto Komandante Geral PNTL Afonso de Jesus, Diretora Geral MTCI Manuela G.B. Corte-Real, no mos Inspketor Geral MTCI Epifanio da Silva Faculto.
Wainhira sorumutu halao Ministru Gil husu ba PNTL no Administrador sira hotu atu servisu hamutuk hodi evita manipulasaun ba foos MTCI.
“Ami husu ita atu servisu hamutuk hodi eveita manipulasaun ne’ebe mak akontese durante ne’e. tamba subsidiu ne’ebe mak governu fo ba povu nia folin la liu husi $ 12 dolar. Presu ne’e tenki implementa iha Distritu, Sub-distritu, to iha sukus no aldeia hotu,”husu Gil.
“Kuandu mosu manipulasaun iha baze husu ba Administrador no PNTL atu servisu hamutuk hodi prende no faan fali ho presu ne’ebe mak governu determina ona,”dehan nia.
Nia mos aumenta katak, bazeia ba diploma ministerial governu bele fo sangsaun ba empresarius ne’ebe mak faan foos la tuir presu.
Gil dehan MTCI mos oras ne’e dadaun fo oportunidade ba impresarius hotu atu bele ba sosa fos iha armazen governu. Maibe iha criteria ne’ebe MTCI husu atu empresarius tenki kumpri.
“Kriteria ne’e hanesan empresarius tenki iha fatin atu tau fos (kios/loja), tenki iha fatin rai foos (Armajenamentu) no tenki iha Sertifikadu lisensiamentu (surat ijin usaha),”informa nia.
Iha fatin hanesan Sekretariu Estadu da Seguransa hateten, problema foos hanesan problema ne’ebe mak seriu tebes no presiza atensaun husi governu, PNTL no outiridades local.
“Liu husi orientasaun ne’ebe bazeia ba diploma ministerial mak iha ona ita bele halao asaun ba empresarius ne’ebe mak ita konsidera nakar,”dehan nia.
“Hau apela ba PNTL atu reforsa liu tan kontrola ba empresariu sira. Sei hetan empresarius ruma ne’ebe mak halao manipulasaun bele toma medidas tuir regras ne’ebe mak iha,”apela Francisco.
Komandante Polisia Distritu Dili, Pedro Belo hateten, PNTL pronto atu kapturasaun ba empresarius ne’ebe mak konsidera halao manipulasaun ba presu foos MTCI.
“Ami pronto servisu hamutuk ho governu hodi kontrola ba presu foos MTCI iha Mercado. Ami sei halao asaun ba empresarius ne’ebe mak halao manipulasaun tuir orientasaun ne’ebe mak ami hetan,”informa nia.

Jornal Nasional STL (Segunda 14/09)
(Media/MTCI)