Populasaun Distritu Bobonaro Husu MTCI Seriu Sosa Produtu Lokal
MTCI TIMOR-LESTE
DILI-Populasaun Distritu Bobonaro husu ba Ministeriu Turismo, Comersiu no Industria (MTCI) atu seriu sosa produtus lokal liu husi programa “Povu Kuda Governu Sosa”, labele sai fali povu kuda governu “sae”.
Administradór Distritu Bobonaro, Domingos Martins hateten, programa MTCI to’o oras ne’e ladun serio sosa produtu lokal, tanba ne’e halo povu balun hirus hodi fokit sai tiha papan ne’ebé MTCI hakerek iha programa povu kuda governu sosa.
“Ami povu Bobonaro husu ba MTCI atu seriu sosa produtu lokal povu nian, tanba produtu lokal sira nia produs barak, maibé governu la ba sosa to sira losu sai tiha papan, lori ba tau fali iha ha’u nia kantor”, dehan Administrador Domingos, Sesta liu ba.
Nia dehan, hafoin governu Japaun no governu TL inagura tiha irigasaun bee ba povu Maliana. Oras ne’e dadauk povu barak kontente kontinua halo toos kuda haré, batar, lis modo, tomate, aifarina, fehuk, forai no hahan seluk tan.
Tuir nia katak, tinan 2009 nudar tinan kontente ba povu Maliana, tanba kuaze 80% povu ne’ebe moris iha agrikultura sira nia produsaun haré sa’e maka’as, tanba bee irigasaun lao lancar.
“Ita hatene katak osar ne’e dadauk irigasaun bee ba natar povu lao didiak, tanba ne’e povu Maliana ne’ebé iha 80% maioria moris vida agrikultura sira nia produsaun haré sae maka’as,” nia hateten.
Tanba ne’e nia husu ba MTCI atu labele sosa produtu lokal povu iha tempu deit, maibé sebele semana-semana ekipa MTCI tun ba Maliana hodi obserba produsaun produtu lokal povu lao oinsa.
Konaba areia turismu, Administrador Bobonaro husu ba MTCI atu ba to iha areia Bemanas Suku Marobo hodi obserba fatin turismu iha ne’ebé tenki hadiah para bele atrai turista barak ba iha neba.
Iha fatin hanesan, Responde ba kestaun ne’e, Ministru Gil Alves dehan, sei hatun ekipa ba Bobonaro hodi sosa produtu lokal povu.
Tuir Gil Alves katak, programa povu kuda governu sosa laos haré deit ba produtu lokal povu Bobonaro, maibé kobre distritu 13 povu barak mos ezize governu sosa sira nia produtu lokal.
“Konaba programa povu kuda governu sosa, ami nia ministerio hala’o nafatin, maibé tanba servisu ne’e talves ezize haré mós ba povu distritu 13 tanba ne’e talves programa lao labele kobre to suku balun,” nia hateten. Gil Alves, apela mos ba povu hotu atu kontinua hatudu sira nia badinas nafatin, tanba governu sei la taka matan ba produtu local povu.arz
Jornal Nasional STL, Tersa-Feira (15/09)
