Folin Foos MTCI Sa’e Arbiru,Governu-PNTL Sei Kontrola Haleu TL
MTCI TIMOR-LESTE
Dili-Governu hamutuk ho PNTL kordena ona katak, sei halo kontrola haleu iha Timor Leste (TL), hodi hare folin foos MTCI ne’ebe oras ne’e sa’e arbiru, la tuir tabela presu ne’ebe Governu hasai tiha ona.
“Iha konstituisaun hateten, ita tenki proteje konsumidores sira nia direitu atu hetan kualidade srvisu diak, kualidade iha presu ne’ebe mak los no inklui sel-seluk tan,” afirma Ministru Turismo, Comersio no Industria (MTCI) Gil Alves iha nia intervensaun badak, iha sorumutuk entre Governu ho Komandante PNTL Distritu 13 iha eis Merkado Lama, Sesta (11/9).
Haklaken Ministru Gil Alves, oras ne’e esforsu husi Governu nian atu hadia duni sistema presu sasan, tamba iha parte balun ke hakarak duni folin sasan iha merkadu, tamba balun foos iha hela, sira ba hatama tiha iha uma laran, sira lansa fali isu dehan foos la iha ona, nune’e sir abele aumenta presu foos.
“Governu apoio foos atu para parte hotu bele hetan, mas ho folin ka presu ne’ebe ki’ik, maibe iha merkadu mak halimar fali ho presu, Governu sei kontrola no foti medidas ba hahalok sira ne’e tamba ida ne’e krimi, ne’e duni sira ne’ebe halo ida ne’e mos sei hasoru Polisia,” katak Ministru Gil Alves.
Ministro Estatal Arcangelo Leite iha nia intervensaun badak hateten, oras ne’e dadauk responsabilidade maksimu iha nivel Distritu mak Administrador Distritu, e la iha razaun kuando orden ruma mak sai husi sentral hatan, la hatene, tamba se la hatene tenki buka hatene.
“Ne’e duni labele deit kumpri orden ne’ebe fo sai mai husi deit Estatal, maibe tenki kumpri mos orden husi Miniteriio hotu, tanba ne’e Administrador sira tenki servisu hamutuk ho PNTL iha Distritu hotu-hotu, para hare situasaun povu nian, hanesan oras ne’e folin foos ne’ebe sa’e arbiru deit,” katak Ministru Estatal.
Oportunidade hanesan, Sekretariu Estadu Seguransa (SES) Farnsisco Guterres hateten, Governu no PNTL la kohi atu ema aporveita hodi kria instabilidade ba folin foos.
“Tanba ne’e, ne’e kestaun importante ida, e ba ami hare hanesan kestaun nasional, kestaun ke afeta teb-tebes ba seguransa, tanba ne’e mak hau husu ba PNTL atu labele halimar ho ida ne’e, ida ne’e ita tenki mantein presu ne’ebe sai tiha ona, hodi seluk labele halimar ho presu, para povu mak sai vitima nafatin,” katak SES Fransisco.J-2
Jornal Nasional Diariu Edisaun Tersa-Feira (15/09)
