Kampanha “Povu Kuda Governu Sosa” Distritu Viqueque, Sub-Distritu Watu-Lari, Suku Makadiki
MTCI TIMOR-LESTE
MTCI : Juventude Makadiki Tenki Badinas Hasae Produsaun ba Produtus Lokal, Nunee Tinan 10 TL la Depende ba Importasaun Foos
DILI- Governu liu husi Ministeriu Turismo Comersiu no Industria halao kampanha Produtu Lokal iha Distritu Viqueque, Sub-Distritu Watu-Lari, Sabadu (05/09) semana kotuk. Kampanha ne’e hetan partispasaun Masimu husi populasaun Distritu refere.
Ministru Turismo, Comersiu no Industria Gil da Costa ne’ebe akompanha husi Sekretariu Estadu Agrikultura no Peskas hanesan mos Ministru Agrikultura no Peskas interino no Sekretariu Estadu Pekuaria wainhira hasoru malu ho populasaun hateten, vizita ne’ebe mak nia halao ba distritu ne’e atu kumpri promesa ne’ebe mak nia halao ba povu hodi hasoru malu diretamente atusosializa ba povu ba programa Povu Kuda, Governu Sosa.
“Hau kumpri hau nia promesa ne’ebe hau halao ona iha tinan kotuk, atu halibur hamutuk ho povu Distritu Viqueque, Sub-Distritu Watu-Lari, Suku Makadiki atu koalia diak liutan sobre ba programa IV governu Konstituisional ne’ebe mak lidera husi Primeiru Ministru Kay Rala Xanana Gusmão ba programa Povu Kuda Governu Sosa,”dehan nia wainhira halao deskursu ba abertura kampanha ne’e.
Ministru TCI fo koragen ba povu Makadiki atu kontinua hasae sira nia produsaun tamba governu pronto atu sosan produtus local.
“Governu sei kontinua alokal osan hodi sosa produtus local ne’ebe mak povu sira produs. Ho nune’e hanesan reprezentante governu hau husu ba ita boot sira atu kontinua hakas aan hodi hasae pordusaun,”tenik Gil.
Nia mos hatutan tan katak, husu ba jovem sira atu hadook aan husi Violensia no badinas liu tan atu ajuda inan-aman hodi hasae kualidade no kuantidade produtus local.
“Buat hotu governu sei halao ba povu nia moris diak maibe ita nia nasaun presiza estabilidade mak buat hotu sei lao diak. Jovem mak hanesan forsa ba nasaun estabilidade iha imi (joventude) nia liman. Husu ba imi atu badinas ba toos hodi halao produsaun makas tamba ami governu promote no pronto atu sosa,”apela Ministru.
Ministru Gil reforsa katak, governu AMP mosu ho programa Povu Kuda Governu Sosa tamba tamba too ona tempu Timor Oan hetan nia indepensia lolos.
“Too ona tempu ba ita Timor Oan atu independente loloos, katak sei ita hakas aan atu hasae produsaun foos maka iha tinan 10 oin mai Timor Leste sei la depende ona ba importasaun foos husi nasaun liur,”reforsa Ministru.
Tuir programa governu ne’ebe mak iha, governu laos fo deit importansia ba Haree maibe mos fo importansia ba produtus hanesan, Fore-Munggu, Fore-Keli, Fore-Rai, Aifarina, Batar, Mina-Nuu, Kamii no seluk tan.
“Governu servisu hamutuk ho empresairus local iha distritu ida-idak atu sai hanesan parseirus ba governu sira mak sei sosa produtus local husi agrikultura sira hodi fo ba governu atu sosa tutan fali,”dehan nia.
“sei ita nia produtus local barak liu ita sei faan ba rai liur hodi hatudu ba mundu katak ita komesa halao revolusaun ruma ba ita nia moris husi buat ida ladiak sai ida diak. Ba ami governu importante liu mak povu nia moris diak,”dehan nia.
Alende halao kampanha ba produtus local, Ministru TCI mos iha oportunidade ne’e akompanha Sekretariu Estadu Agrikultura no Peskas (SEAP) Marcus da Cruz no Sekretarius Estadu Pakuaria (SEP) halao mos kolheta ba haree ho hectares 40 iha suku Makadiki.
Iha serimonia kolheta haree ne’e, SEAP hatete, Ministeriu Agrikultura sei kontinua ajuda populasaun atu hasae sira nia produsaun liu husi meius fahe traktor importante liu mak povu tenki bandinas no haluha problema.
“imi tenki hatene katak, saida mak governu halo hodi fo benefisiu ba imi hodi hadia moris, tan ne’e husu ba agrikultor sira hotu atu forma grupu hodi bele hetan traktor hodi halai natar nune’e bele produs haree barak para faan ba governu,”informa Marcus.
Marcus reforsa tan katak, MAFP no MTCI sei lao hamutuk atu reforsa programa Povu Kuda Governu Sosa hodi avansa ba oin.
“Tamba liu husi Programa Ministeiru Turismo Comersiu no Industria mak povu sei hetan osan hodi dudu sira nia oan ba eskola,”haktuir MAFP interino.
Iha fatin hanesan mos, Administrador Sub-Distritu Watu-Lari Tomas da Silva agradese ba programa ida ne’e tamba liu husi programa governu ida ne’e mak bele muda sira nai moris.
“Hau lori komunidade tomak nia naran hatoo ksolok boot ba governu ida ne’e. No ami husu atu programa ne’e tenki implementa duni iha ami nia distritu ida ne’e, nune’e ami bele hatene ba ne’ebe mak ami nia produtus ne’e ami bele faan,”espera Tomas.
No nia husu ba komunidade sira atu tau fiar ba governu ida ne’e liu-liu ba program Povu Kuda Governu Sosa, tamba liu husi programa ne’e mak bele hasai povu husi mukit no susar.
Antes remata kampanha ne’e MTCI, MAFP Interino no mos SEP halao avaliasaun ba konkurusu aihan husi produtus local ne’ebe mak partisia husi feto suku refere ne’ebe mak fahe ba grupu Lima (5).
