Ministru Gil : Povu Tenki Kolabora Kontrola Foos MTCI
MTCI TIMOR-LESTE
Dili-Ministru Turismo, Comersiu no Industria (MTCI) Gil da Costa Alves, husu ba povu tomak atu kolabora ho governu hodi kontrola presu foos MTCI iha mercado.
Gil husu ba povu atu fo hatene ba autoridade governu ou polisia wainhira haree negosiantes faan foos MTCI ho folin la tuir estandar ne’ebe governu termina tiha ona $12 dolar kada saka 35kg.
“Atu kontrola presu foos MTCI ne’ebe faan husi empresarius tantu povu tomak mos tenki fo kolaborasaun ho governu hodi kontrola lisuk. Maibe se governu mesak sei susar atu kaer empresarius ne’ebe malandru hodi halo investigasaun, tanba empresarius laos ida ka rua deit mak halao manipulasaun maibe barak tebes,”dehan Ministru Gil ba STL iha Palasiu do Governu Dili Kuarta (16/09).
“Empresarius hanesan ponte ida deit atu hatudu foos governu nian ba povu kiik, laos governu fo foos ba sira atu haruku fali aan ne’e la loos np seo karik kaer hetan tantu empresarius ne’e sei blacklist,”informa Ministru.
Iha oportunidade ne’e, Gil hatutan, kriteriu faan foos agora oin seluk ne’e mak empresarius se deit la iha armazen sei la bele fo foos atu faan tanba se laetau deit foos iha Estrada ibun halo foos nia kualidade sai sei ladiak atu consume husi povu.
Iha parte seluk, membru PN Aderito Hugo da Costa reforsa tan katak, kontrola presu foos klaru povu tenki kolabora ho governu. Nune’e bele kontrola didiak empresarius se deit maka faan foos MTCI ho folin karun.
Natalino da Costa hanesan povu hateten, se povu ho governu mak servisu hamutuk hodo kotrola presu foos ne’ebe husi empresarius faan , diak no klaru atu bele kontrola diak liu tan presu foos MTCI iha Mercado. (mds)
Jornal Nasional STL, Edisaun Kinta Feira (17/09)
Pagina 06
