Hadi’a Sistéma Distribuisaun Foos, MTCI Sei Halo Selesaun Foun ba Empresárius
MTCI TIMOR-LESTE
DILI-Ministeriu do Turismo, Comersiu no Industria sei halao fila fali selesaun ba kompania sira ne’ebe durante ne’e faan foos marka MTCI ba komunidade. Selesaun ne’e halo hodi prevene empresárius sira kontinua halo manipulasaun.
Diretora Jeral MTCI, Manuela G. B. Corte-Real hatete katak, hafoin loron 10 Setembru, MTCI sei implementa sistema foun ba distribuisaun foos.
“Depois de dia 10 sei mosu fali sistema foun ba distribuisaun foos nian,”katak nia ba jornalista diariu ne’e iha ninia edifisiu, horseik (08/09).
Kona-ba sistema foun, nia hatutan, MTCI sei estabelese kriteriu sira ba empresárius sira ne’ebe durante ne’e distribui foos no empresárius hirak ne’e tenki priense kriteriu refere.
“Ami la limite numeru empresárius maibe ami tau kriteriu, sira tenki priense kriteriu ne’e, sira (empresárius) tenki iha fatin diak para faan foos, sira tenki iha fatin diak atu tau foos no mos sira tenki iha lisensiamentu de negosiu,”dehan nia.
Liu husi kriteriu hirak ne’ebe sei estabelese, nia hatutan, MTCI sei define empresárius ne’ebe mak sai liman-ain ba MTCI hodi faan foos ba povu.
Diretora ne’e hatutan, hafoi loron 10 de Setemebru ninia parte sei husu ba empresárius tomak atu hatama proposta no MTCI sei halo indentifikasaun.
“Sira tenki prense duni kriteriu ne’ebe ministeriu tau, atu nuen’e funsionamentu ba distribuisaun hodi lao diak,”katak nia.
Kona-ba intervensaun ba foos ne’ebe nia parte halo, Manuela esplika katak, iha loron 10 de Agustu too 10 de Setembru MTCI deside hapara temporariamente distribuisaun foos ba distritu Dili hodi fo espasu ba MTCI atu hadia jestaun iha armajen no halo avaliasaun servisu no mos kontrola ba atividade no stok foos armajen.
Maibe , iha loron 1 de Setembru mosu prekupasaun husi komunidade sira iha capital Dili katak, foos la iha presu no presu foos sai makas , entaun MTCI halo kedan intervensaun diretamente hodi atende lalais kazu ne’ebe mosu.
“Hahu husi loron 1 too 8 Setembru, Intervensaun (foos) ne’e hamutuk toneladas 753, kada saka 35kg, ita bele hateten katak maioria konsumedores iha kapitala Dili iha ona foos atu atende nesesidade,”katak nia.
Nia informa tan katak, hafoin loron 10, MTCI sei hapara intervensaun, maibe wainhira iha nesesidade emerjensia ruma MTCI pronto atu atende nafatin. (gin)
Notisia Jornal Nasional Timor Post
Kuarta, 09 de Setembru de 2009, Pag. 06
