Vizita Ofisiál Ministériu Turismo, Comersiu no Industria Ba Vietname, Hanoi 22-23 de Setembru 2009
MTCI TIMOR-LESTE
DILI-Governu Timor Leste liu-husi Ministériu Turismo, Comérsiu no Indústria hala’o vizita ofisiál ba Hanoi, Vietname. Iha vizita durante loron tolu (21-23) MTCI asina Memeorandum of Uunderstanding (MoU) hamutuk ho Ministériu Comérsiu no Indústria (MCI) Sosialista Repúblika de Vietname iha area importasaun Foos, Materias atu suporta produsaun Aihan no mos Koperasaun iha Asisténsia Treinamentu ba Rekursus Humanus.
Akordu ne’e hanesan parte ida atu hametin di’ak liu-tan relasaun entre governu Vietname no governu Timor Leste ba iha Futuru.
Antes atu asina akordu hirak ne’e, delegasaun hala’o mós negosiasaun hamutuk ho Diretores husi MCI-Vietname hodi hetan konkordansia husi parte rua ba MoU ne’ebé mak asina husi Ministru TCI Timor Leste no Ministru CI Vietname.
Wainhira asina akordu ne’e, MCI-Vietname Vu Huy Hoang hatete, nia parte kontente ho reasaun pozitivu ne’ebe mak governu Timor Leste hatudu ona hodi responde ba konvite ne’ebe mak nia governu Vietname hatoo ba governu TL.
“Hau kontente tamba governu Timor Leste responde duni ami nia konvite hodi delega ita-boot (Ministru Turismo Comérsiu no Indústria) mai iha Vietname hodi realiza akordu ida ne’e,”dehan Vu.
Nia mos hatutan katak, liu husi koperasaun bilateral ida ne’e, bele hametin di’ak liu-tan relasaun amizade entre TL no Vietname.
Durante hala’o Vizita iha Vietname Ministru Turismo, Comérisu no Indústria Gil da Costa Alves hetan konvite husi Primeiru Ministru Vietname Nguyen Tan Dung hodi hala’o sorumutu hamutuk iha palásiu do governu Hanoi-Vietname.
Primeiru Ministru Vietname hatete, importante liu entre nasaun rua ne’e atu hametin liu-tan relasaun bilateral iha area Ekonómia, Comérsiu no Investimentu. No mos husu atu nasaun rua ne’e bele dezenvolve liu husi asina akordu koperasaun iha area ne’ebé mak potensiál ba benefísiu rai rua ne’e.
Primeiru Ministru de Sosialista Repúblika Vietname mos suporta koperasaun ne’ebé mak hala’o ona hodi suporta importasaun foos mai Timor Leste. Iha oportunidade ne’e mos Ministro de Indústria e Comérsiu Vu Huy Hoang hato’o ba Ministro Turismo Comérsiu no Indústria TL, Gil da Costa Alves katak, governu Vietname sei delega nia grupu de Comérsiu e Investimentu atu mai visita Timor Leste.
Nia obejtivu mak atu observa area Indústria e Comérsiu iha TL atu bele hatene liu-tan area ne’ebé mak atu kopera e institusaun ne’ebé mak relevante ba koperasaun ne’e iha future. Grupo delegasaun husi Vietname sei mai visita TL iha fim de Outubro.(Media MTCI)
