Lotaria Populár Fo Servisu Ba Joventude
MTCI TIMOR-LESTE
DILI-Jogus Lotaria Populár ka SDSB ne’ebé mak governu legaliza la’os ho intensaun atu supa povu nia osan no fo impaktu negativu ba povu nia moris, maibé bele fo servisu ba Timor oan sira no mos bele trava tiha jogu illegal ne’ebé mak fo impaktu negative ba povu ki’ik.
Kestaun ne’e informa husi estudante Universitáriu Mariano do Santos ba STL iha Liçeu Dili, Kuarta (09/9).
“Ha’u hanoin governu nia intensaun legaliza jogus lotaria ne’e la’os ho intensaun supa povu ki’ik maibé evita hikas jogu illegál seluk ne’ebé mak mosu barak iha Timor Leste,”Mariano hateten.
Nia husu ba governu liu-liu Ministériu Turismo, Comérsiu no Indústria (MTCI) atu tau lei forsa hodi kontrola jogus illegál hirak ne’ebé mak buras iha teritóriu laran.
Kestaun hanesan mos informa husi estudantes UNTL Zulmiro Soares. Nia dehan jogu Lotaria Populár bele loke ou aumenta tan kampu de traballu ba povu kiik sira ne’ebé mak oras ne’e la hetan servisu. No mos bele impede osan labele sai ba nasaun seluk.
“Osan ne’ebé mak governu hetan husi jogus ne’e bele mos aloka fali hodi kria dezenvolvimentu, hanesan hadia Estrada, harii eskola no bele investe iha fatin seluk,”dehan nia.
Entertantu Inspektór Nasionál de Jogus MTCI Miguel Lobato hatete, governu legaliza jogu ne’e atu fasíl kontrola jogus seluk no mos bele prevene ema bandidus ne’ebé hakarak halao nafatin jogus illegal iha rai laran.
“Laos meius ba governu atu hetan reseitas husi ema ki’ak, maibé obrigatóriu tenki legalija atu bele kontrola jogus illegal ne’ebé lao nafatim iha rai laran. Parte seluk mos governu lakohi ema seluk buka riku husi ema ki’ak sira nia kosar been no la selu reseitas ba governu,”esplika Miguel.
Jogus ne’e rasik legaliza ho Dekretu Lei No. 06/2009. Maibé Miguel rekoñese katak, opiniaun husi empresárius politíku nain sira, soseidade sivil, akadémiku no parte seluk loos. Maibé susar atu taka tamba ne’e, maka governu hakarak legaliza hodi tau regulamentu ne’ebé ikus mai ita bele kontrola di’ak liu tan. (milk)
Jornal Nasional STL, edisun Kinta 10 Setembru 2009
Pagina 06
